“දිට්වා” (Ditwah) කුණාටුවෙන් දැඩි ලෙස පීඩාවට පත් ශ්රී ලංකාවේ මෙහෙයුම් කටයුතු සඳහා සහයෝගය දක්වනු පිණිස, මෙවැනි අවස්ථාවන් උදෙසාම පිහිටුවා ඇති ඉන්දීය ජාතික ආපදා ප්රතිචාර බලකායේ (NDRF) ගුවන් යානයක් පසුගිය 29 වැනි සෙනසුරාදා පෙරවරුවේ දී ශ්රී ලංකාවට පැමිණි අතර එම කණ්ඩායමට ඉතා උණුසුම් පිළිගැනීමක් ලැබුණි.
මේ බලකාය පිරිමි සාමාජිකයින් 76 කින් සහ ගැහැනු සාමාජිකයින් 4 කින් සමන්විත විශේෂඥ පිරිසකින් පමණක් නොව, සෙවීම් කටයුතු උදෙසා පුහුණු කරනු ලැබූ සුනඛ සාමාජිකයින් 4 දෙනෙකුගෙන් ද සමන්විත විය. විශේෂයෙන්, රාණි, මිකී, ලයිකා සහ රැම්බෝ යන සුනඛයින් සිව් දෙනාගේ පැමිණීම ශ්රී ලංකාවේ සුනඛ ලෝලීන්ගේ දැඩි අවධානයට ලක් වූ කාරණයක් විය. ආපදාවට පත්වූවන් ගලවා ගැනීමට සහයෝගය පළකරන්නැයි ඉන්දියාවෙන් කළ ඉල්ලීමට ප්රතිචාරයක් වශයෙන් මේ කණ්ඩායම පැමිණ තිබිණි.
NDRF හි සුනඛ ඒකකය බොහෝ විට ආපදා කලාපවල නිහඬ වීරයන් ලෙස සැලකේ. ඔවුන්ට මිනිසුන්ට ළඟා විය නොහැකි ස්ථාන කරා ගොස්, ඇතැම් විට තාක්ෂණය ඔස්සේ පවා සොයා ගැනීමට දුෂ්කර ස්ථානවල, සුන්බුන් මැද පිහිට අපේක්ෂාවෙන් සිටින මිනිසුන් සොයා ගැනීමේ විශේෂ හැකියාවක් තිබේ.
සුනඛ කණ්ඩායම අතරින්, රාණි, ගැහැණු ලැබ්රඩෝ සුනඛයෙකු වන අතර, ඇයගේ සන්සුන් ස්වභාවය සහ යම්කිසි තැනක මිනිස් ජීවිතයක් සිරවී සිටීද යන්න ඉව ඔස්සේ හඳුනා ගැනීමේ අසාමාන්ය හැකියාවක් ඇත. ලැබ්රඩෝ සුනඛයන් ඔවුන්ගේ බුද්ධිය, සන්සුන් ප්රවේශය, අවුල් සහගත පරිසරයන්ට අනුවර්තනය වීමේ හැකියාව සහ ප්රබල ආඝ්රාණ සංවේදීතාව (ඉව දැනීමේ හැකියාව) හේතුවෙන් NDRF බලකාය විසින් බහුලව යොදා ගනියි.
රාණි ඇගේ මූලික පුහුණුව ලැබුවේ පුනේ හි පිහිටි NDRF හි K9 පුහුණු මධ්යස්ථානයේදී වන අතර, එහිදී තරුණ සුනඛයන් මාස ගණනාවක් කීකරුකම, කඩිසරකම, සුවඳ වෙන් කිරීම සහ ආපදා-තත්ත්ව අභ්යාසයන් සඳහා පුහුණු කරනු ලැබේ. ඇගේ පුහුණුකරුවන් ඇයව ඉතා අවධානශීලී සහ ඕනෑම ගැටලුකාරී අවස්ථාවකදී පවා කලබල නොවී සිටීමට පුහුණු කරවයි. මිනිසකුට රිංගා යා නොහැකි ඉතා සීමිත ඉඩකඩක පවා නිවැරදිව සෙවීම් කටයුතු කරන්නට මොවුන්ට හැකියාව තිබේ. වයස අවුරුදු හතරක් පමණ වන රාණි සිය හැකියාවන්ගේ උපරිම තලයක සිටින බව පැවසේ.
පිරිමි ජර්මන් ෂෙපර්ඩ් සුනඛයෙකු වන මිකී සතුව ඇත්තේ වෙනස් හැකියාවන්ය. ජර්මන් ෂෙපර්ඩ් සුනඛයන් ඔවුන්ගේ ශක්තිමත් බව සහ කඩා වැටුණු ගොඩනැගිලි හෝ සුන්බුන් ගොඩවල් වැනි දුෂ්කර භූමි ප්රදේශවල ගමන් කිරීමේ හැකියාව සඳහා ඉතා ප්රකටය. විවිධාකාර බාධක මැඩගෙන අවශ්ය ස්ථානයට ළඟාවන ආකාරය, ගින්න, දූවිලි, ජලය ආදී ඕනෑම පරිසරයක් තුළ මෙහෙයුම් කටයුතු කිරීමේ හැකියාව මිකීට තිබේ. සැක කටයුතු ගන්ධයක් ඉව වැටුණු පසු නොනවත්වා බුරමින් ඒ සම්බන්ධව දැනුම්දීමට පුහුණු කර තිබේ. වයස අවුරුදු පහක් වන මිකී දැනටමත් ඉන්දියාව තුළ සැබෑ ගලවා ගැනීමේ මෙහෙයුම් බොහොමයක් සඳහා සහභාගී වී පළපුරුද්ද ඇති අතර එය ශ්රී ලංකාවේ මෙහෙයුම් සඳහා ඉතා ප්රයෝජනවත් වනු ඇතැයි අපේක්ෂා කෙරේ.
වේගය මැනිය හැකි දක්ෂතාවයක් නම්, ලයිකා කණ්ඩායමේ වේගවත්ම සුනඛයා වේ. ඇය ද ලැබ්රඩෝ සුනඛයෙකු වන අතර, නිරවද්යතාවය පවත්වා ගනිමින් පුදුමාකාර වේගයකින් සෙවුම් කලාප ආවරණය කිරීම සඳහා ප්රසිද්ධ ය. ඇයට ලබා දී ඇත්තේ අභ්යවකාශයට පිවිසි සෝවියට් රුසියානු ගැහැනු සුනඛයාගේ නම වන අතර, ඇය තුළ පවතින අසීමිත ශක්තිය සහ දරා ගැනීමේ හැකියාව හඳුනාගත් ඇගේ පුහුණුකරුවන් ඇයට මේ නම තබා තිබේ. ලයිකාගේ විශේෂත්වය වන්නේ ඉතා වේගයෙන් සෙවීම් කටයුතු කිරීමේ හැකියාවය. කාලය ඉතා තීරණාත්මක වන ආපදාවක මුල් භාගයේ දී ඇගේ සේවය ඉතා වැදගත්ය. ඇගේ පුහුණුවට ඉහළ තීව්රතාවයකින් යුත් විඳදරාගැනීමේ අභ්යාස, දිගු දුර සුවඳ ලුහුබැඳීම සහ ඝෝෂාකාරී ශබ්ද හා අවුල් සහගත පරිසරයන්ට හැඩගැසීම ඇතුළත් විය. වයස අවුරුදු තුනහමාරක් පමණක් වන ඇය, තවත් වසර දහයක පමණ සේවයක් ලබා ගත හැකි යැයි අපේක්ෂා කෙරේ.
සිව්වන සාමාජිකයා වන රැම්බෝ යනු නමටම ගැලපෙන පරිදි (හොලිවුඩ් සිනමාවේ ඉහළ වීරත්වය විදහා පාන චරිතයක නමකි) ඉතා ප්රබල සුනඛයෙකි. රැම්බෝ, බෙල්ජියම් මැලිනොයිස් වර්ගයේ සුනඛයෙකු වන අතර, ඔවුන් ඉන්දියාවේ ජාතික ආරක්ෂක බලකාය (NSG) සහ ජාත්යන්තර ආපදා ප්රතිචාර ආයතන කිහිපයක් ඇතුළුව ලොව පුරා ප්රභූ හමුදා සහ ගලවාගැනීමේ ඒකකවල වැඩි වශයෙන් දක්නට ලැබෙන සහ එවැනි බලකායන් ඉතා කැමති සුනඛ වර්ගයක් ලෙස සැලකේ.
මැලිනොයිස් සුනඛයන් ඔවුන්ගේ අසාමාන්ය විඳදරාගැනීම, වෙහෙසකින් තොරව දිගු වේලාවක් වැඩ කිරීමේ හැකියාව සහ ජීවය සහිත පුද්ගලයකුගේ සුවඳට සහ යම් අනතුරක් සිදුවන්නට ඉතා ආසන්න නම්, ඒ කෙරෙහි ඇති සංවේදිතාව ද ඉතා ඉහළ යැයි පැවසේ. අවුරුදු හතරහමාරක් පමණ වන රැම්බෝ, ශක්තිය, ශක්තිමත්බව සහ විනය යන අංශයන්ගෙන් කැපී පෙනෙන අතර එය සෙවුම් මෙහෙයුම් සඳහා ප්රබල ලෙස දායක වේ.
NDRF සුනඛ බඳවා ගැනීම් සාමාන්යයෙන් බලු පැටවුන් ලෙස, සති 8 සිට 10 දක්වා වයසේදී, ස්වභාවය, කුතුහලය, විශ්වාසය සහ ශාරීරික ව්යුහය වැනි නිශ්චිත නිර්ණායක මත පදනම්ව තෝරා ගනු ලැබේ. තෝරාගත් පසු, ඔවුන් මාස 8-10 ක දැඩි පුහුණු වැඩසටහනකට ඇතුළත් වන අතර, පසුව ඔවුන් ජ්යෙෂ්ඨ පුහුණුකරුවන් යටතේ සේවය කරන පරිවාස කාලයකට යටත් කරනු ලබයි. ව්යාජ ආපදා තත්ත්වයන් තුළ ස්ථාවරව විශ්වසනීයත්වය විදහා දක්වන සුනඛයන් පමණක් මෙහෙයුම් සෙවුම් සුනඛයන් ලෙස තහවුරු කරනු ලැබේ.
එක් එක් සුනඛයා ඔවුන්ගේ මුළු සේවා කාලය පුරාම තනි පුහුණුකරුවෙකු සමඟ සම්බන්ධ කරනු ලැබේ. මෙම බැඳීම ඔවුන්ගේ කාර්යක්ෂමතාවයේ කේන්ද්රස්ථානයයි. පුහුණුකරු සුනඛයාගේ චර්යාත්මක ඉඟි ඉගෙන ගන්නා අතර, සුනඛයා අධික ආතතිය යටතේ වැඩ කිරීමට විශ්වාසය සහ සූදානම වර්ධනය කරයි. රාණි, මිකී, ලයිකා සහ රැම්බෝ යන සුනඛයන් හතර දෙනාම වසර ගණනාවක් තිස්සේ ඔවුන්ගේ අදාළ පුහුණුකරුවන් සමඟ පුහුණුව ලබා ඇති අතර, ඉහළ අවදානම් සහිත ගලවා ගැනීමේ මෙහෙයුම්වලදී අත්යවශ්ය හවුල්කාරිත්වයන් ගොඩනඟා ගෙන තිබේ.
පොදුවේ ගත් කල, NDRF බලකායේ සුනඛයන්ගේ, ජීවමාන පුද්ගල සුවඳ හඳුනා ගැනීම, සුන්බුන් සහ සීමිත අවකාශයන්හි සෙවීම, පුළුල් ප්රදේශයක වේගවත් සෙවීම, අස්ථායී භූමි ප්රදේශවල ගමන් කිරීම, අධික ශබ්ද, අධික අවුල් සහගත පරිසරයන්ට ඔරොත්තු දීම, බුරමින් හෝ වෙනත් ඉඟි මගින් ඇඟවීම් කිරීමේ තාක්ෂණය ආදී ලක්ෂණ දැකිය හැකි වේ.
ඔවුන්ගේ ඇති ප්රබලතම වාසිය වන්නේ වේගයයි. පුහුණු කළ ගලවා ගැනීමේ සුනඛයෙකුට මිනිස් කණ්ඩායමකට පැයක් ගත විය හැකි ප්රදේශයක් මිනිත්තු 10 කින් සෙවිය හැකිය. ශ්රී ලංකාවේ ආපදා සහන මෙහෙයුම්වලදී, මෙම සුනඛයන් සිරවී සිටින දිවි ගලවා ගත් අය සොයා ගැනීම, කඩා වැටුණු ව්යුහයන් හරහා ආරක්ෂිත මාර්ග හඳුනා ගැනීම සහ මිනිස් ජීවිතය පැවතීමට වැඩි ඉඩක් ඇති ප්රදේශවලට ප්රමුඛත්වය දීමට උපකාර කිරීම මගින් දේශීය කණ්ඩායම්වලට සහාය වනු ඇතැයි අපේක්ෂා කෙරේ. ඔවුන්ගේ පැමිණීම, විශේෂයෙන් ගලවා ගැනීමේ මෙහෙයුමක තීරණාත්මක මුල් පැයවලදී සෙවුම් ප්රයත්නයන්හි කාර්යක්ෂමතාව සැලකිය යුතු ලෙස වැඩි කරයි.
කතා කළ නොහැකි වුවත්, ආපදා අවස්ථාවල දී රාණි, මිකී, ලයිකා සහ රැම්බෝ වැනි සුනඛයන්ගේ උපකාරය වචනයෙන් විස්තර කළ නොහැකි තරම්ය. ඔවුන් කාංසාව බලාපොරොත්තුව බවටත්, අවිනිශ්චිතතාවය මඟ පෙන්වීම බවටත්, අවුල් සහගත බව සම්බන්ධීකරණ ක්රියාව බවටත් පරිවර්තනය කරයි. ඔවුන් ශ්රී ලංකාවට පැමිණීම හුදෙක් ආපදා මෙහෙයුම් සිදු කිරීමකට වඩා වැඩි දෙයකි. ඒ අනාදිමත් කාලයක් තිස්සේ මිනිසාත් සුනඛයාත් අතර පවතින බැඳීම අසීමිත යැයි පෙන්වන සංකේතයකි.
නිරංජන් චාමින්ද කරුණාතිලක
උපුටා ගැනීම – vinivida.lk
