ශ්රී ලංකාවේ මැතිවරණ ක්රියාවලියට අදාළ යල් පැන ගිය නීති රීති, විශේෂයෙන්ම ඡන්දදායකයාගේ ඇඟිල්ලේ තීන්ත ආලේප කිරීම වැනි ක්රමවේදයන් කඩිනමින් වෙනස් කර නිදහස් හා සාධාරණ මැතිවරණ පැවැත්වීමට තම කොමිසම උපරිම උත්සාහ ගන්නා බව මැතිවරණ කොමසාරිස් ජනරාල් සමන් ශ්රී රත්නායක මහතා පවසයි.
‘මැතිවරණ කොමිෂන් සභාව සහ පැෆරල් සංවිධානය අපි සේරම එක ගමනක් යන පිරිසක් හැටියටයි කටයුතු කරන්නේ. මැතිවරණ ක්රියාවලියේ අපි හැමෝම ගැටලු ඇති තැන් නිරීක්ෂණය කරමින් විවිධ පාර්ශ්ව දැනුම්වත් කරනවා. මැතිවරණ නීති ක්රියාවලියේ ඉතා ඉක්මනින්ම වෙනස් විය යුතු නීති තිබෙනවා. ඒවාට ලබා ගන්නා යෝජනා, අදහස් අනුව අපි ඉතා ඉක්මනින් මේ මැතිවරණ ක්රියාවලියේ නීති රීති වෙනස් කිරීමට බලාපොරොත්තු වෙනවා. ගොඩක් අය පළාත් සභා මැතිවරණය තියන්න කියා ඉල්ලීම් කරනවා. හැබැයි ලංකාවේ නීතියක් නැහැ. පළාත් සභා ඡන්දයක් තියන්න කියලා. ආබාධිත පුද්ගලයන් වෙනුවෙන් ඡන්දය ප්රකාශ කිරීමට සහ ඡන්ද මධ්යස්ථානයේ අපි පහසුකම් ඇති කිරීමේ කඩිනම් වැඩපිළිවෙළක් සකස් කරනවා. ඒ වගේම තමයි පසුගිය පළාත් පාලන මැතිවරණයේදී වත්කම්, බැරකම් නොදුන් පළාත් පාලන නියෝජිතයන් 2200කට වැඩි පිරිසක් ඉන්නවා. නොදුන් අයටත් අපි නීතිරීති ක්රියාත්මක කරන්න බලාපොරොත්තු වෙනවා. ඡන්දය ප්රකාශ කිරීමේදී ඇඟිලිවල පාට ලකුණු කරන්න පටන් ගත්තේ 1970 සිටයි. අපි තවත් ඒ ක්රියාව කරනවා. හැබැයි වෙනත් රටවල් මේ ක්රමයෙන් බැහැරව වෙනත් ක්රම අනුගමනය කරනවා. ඇඟිලි පාට කරන්න පමණක් ලොකු ගාණක් වියදම් වෙනවා. ඒවා වෙනස් කරනවාට සමහරු කැමැති නෑ. අපිත් කියනවා මේක වෙනස් කරන්න ඕනෑ කියලා. මේක හරියට බාලගිරිදෝෂය වගේ. මේ වගේ නීති රීති වෙනස් කිරීම කර රටට තවදුරටත් නිදහස් හා සාමකාමී මැතිවරණ පවත්වා සියලු දෙනාට ඡන්ද අයිතිය ලබාදීමේ වැඩසටහනක් ක්රියාත්මක කිරීම තමයි අපේ අරමුණ. අලුතින් ඡන්ද හිමි නාමලේඛනයට ඇතුළත් වන පුද්ගලයන් ඡන්දය ප්රකාශ කිරීමට ඉතාමත් මැළිකමක් දක්වනවා.”
පොළොන්නරුව, තමන්කඩුව ප්රාදේශීය ලේකම් කාර්යාලයේ පැවති වැඩසටහනකට එක්වෙමින් ඔහු මේ බව සඳහන් කළේය. මැතිවරණ කොමිෂන් සභාවේ නව උපායමාර්ගික සැලැස්ම සඳහා රාජ්ය සහ සිවිල් සංවිධානවල අදහස් හා යෝජනා ලබාගැනීම වෙනුවෙන් මෙම වැඩසටහන සංවිධානය කර තිබිණි.
විදෙස්ගත ශ්රමිකයන්, ඇඟලුම් කර්මාන්ත ශාලා සේවකයන් සහ ආබාධිත පුද්ගලයන් වැනි පාර්ශ්වයන්ට ඡන්දය ප්රකාශ කිරීමේ පහසුකම් පුළුල් කිරීමේ අවශ්යතාව මෙහිදී සාකච්ඡාවට ලක්වූ අතර, විශේෂයෙන් ආබාධිත පුද්ගලයන් සඳහා පහසුකම් සැලසීමට කඩිනම් වැඩපිළිවෙළක් සකසන බව කොමසාරිස් ජනරාල්වරයා ප්රකාශ කළේය.
පළාත් සභා මැතිවරණය පැවැත්වීමට ජනතාව ඉල්ලීම් කළද, ඒ සඳහා අවශ්ය නීතිමය රාමුවක් නොමැති බව පෙන්වා දුන් රත්නායක මහතා, පසුගිය පළාත් පාලන මැතිවරණයට අදාළව වත්කම් බැරකම් ප්රකාශ ලබා නොදුන් නියෝජිතයන් 2200කට අධික පිරිසකට එරෙහිව නීතිය ක්රියාත්මක කිරීමට බලාපොරොත්තු වන බවද කියා සිටියේය.
මැතිවරණ නිරීක්ෂණ සංවිධානවල මීළඟ කාර්යභාරය විය යුත්තේ, බලයට පත් වූවන්ගෙන් ජනතා පොරොන්දු ඉටුකරවා ගැනීම සඳහා ‘බලපෑම් කණ්ඩායම්’ ලෙස ක්රියා කිරීම බවද ඒ මහතා වැඩිදුරටත් සඳහන් කළේය.
