සුළි කුණාටුවෙන් ඇතිවූ ව්යසනයට මෙරට ජනතාව නැවත ලක් නොවන අයුරින් අවදානම් සහිත ප්රදේශවල ජීවත්වන ජනතාවට ස්ථිර දීර්ඝකාලීන විසඳුමක් ලබා දීමේ අවශ්යතාව ජනාධිපති අනුර කුමාර දිසානායක මහතා අවධාරණය කළේය.
නිවාස සංවර්ධන අධිකාරියේ සහ මුදල් අමාත්යාංශයේ නිලධාරීන් අතර හමුවකට එක්වෙමින් ජනාධිපතිවරයා දීර්ඝකාලීන විසඳුමක් පිළිබඳව එසේ අවධාරණය කළ අතර එම හමුව ජනාධිපති ලේකම් කාර්යාලයේදී ඊයේ (04) පෙරවරුවේ පැවැත්විණ. දිට්වා සුළි කුණාටුව හේතුවෙන් හානියට පත් නිවාස සහ ඊට අදාළ වන්දි ලබා දීමේ ක්රියාවලිය සොයා බැලීමේ අරමුණින් මේ සාකච්ඡාව කැඳවා තිබිණි.
අයහපත් කාලගුණය හේතුවෙන් පූර්ණ සහ අර්ධ හානියට පත් නිවාස හඳුනාගැනීම නිසි ක්රමවේදයකට අනුව සිදු කරන ලෙසත්, වන්දි ලබා දීම සඳහා අවශ්ය නිවැරදි දත්ත කාර්යක්ෂමව ලබා ගැනීම සඳහා විශේෂ ක්රමවේදයක් සකස් කරන ලෙස ද ජනාධිපතිවරයා මෙහිදී නිලධාරීන්ට උපදෙස් දුන්නේය.
මෙවැනි ව්යසනයකට ජනතාව නැවත ලක් නොවන අයුරින් අවදානම් සහිත ප්රදේශවල ජීවත් වන ජනතාවට දීර්ඝකාලීන විසඳුමක් ලබා දීමේ අවශ්යතාව මෙහිදී අවධාරණය කළ ජනාධිපතිවරයා, ඒ සඳහා නිවැරදි දත්ත හඳුනාගන්නා ලෙසද නිලධාරීන්ට උපදෙස් දුන්නේය.
නාය යෑම් හේතුවෙන් නිවාස 1289ක් පූර්ණ හානියට සහ නිවාස 44,574ක් අර්ධ වශයෙන් හානියට පත්ව තිබෙන බව දැනට සිදු කරන ලද සමීක්ෂණවලදී තහවුරු වී ඇති බව නිවාස සංවර්ධන අධිකාරියේ නිලධාරීන් විසින් මෙහිදී පෙන්වා දුන්නේය.
නිවාස, ඉදිකිරීම් සහ ජල සම්පාදන ඇමැති සුසිල් රණසිංහ, මුදල් අමාත්යාංශයේ ලේකම් ආචාර්ය හර්ෂණ සූරියප්පෙරුම, ජාතික අයවැය දෙපාර්තමේන්තුවේ අධ්යක්ෂ ජනරාල් ජූඩ් නිලුක්ෂාන්, ජාතික නිවාස සංවර්ධන අධිකාරියේ සභාපති අරවින්ද සිරිනාත මහත්වරුන් ඇතුළු නිලධාරීහු මේ අවස්ථාවට එක්ව සිටියහ.
උපාලි කරුණාරත්න
Source – Dinamina
