පාකිස්තානයේ පැවැත්වීමට නියමිතව තිබූ තුන්කොන් විස්සයි20 ක්‍රිකට් තරගාවලියෙන් ඉල්ලා අස්වීමට ඇෆ්ගනිස්තාන ක්‍රිකට් පාලක මණ්ඩලය (ACB) තීරණය කර ඇති බව සෙනසුරාදා නිවේදනය කළේය. නොවැම්බර් 17 වැනිදා සිට ආරම්භ වීමට නියමිතව තිබූ මෙම තරගාවලිය සඳහා සත්කාරක පාකිස්තානය, ශ්‍රී ලංකාව සහ ඇෆ්ගනිස්තානය සහභාගී වීමට නියමිතව තිබිණි.
මෙම හදිසි තීරණය ගැනීමට ආසන්නතම හේතුව වී ඇත්තේ සිකුරාදා (ඔක්තෝබර් 17) සන්ධ්‍යාවේදී ඇෆ්ගනිස්තානයේ පක්ටිකා පළාතේ උර්ගුන් දිස්ත්‍රික්කයේ ක්‍රිකට් ක්‍රීඩකයින් ඉලක්ක කර ගනිමින් එල්ල වූ ප්‍රහාරයකි.
මෙම ප්‍රහාරයෙන් කබීර්, සිබ්ගතුල්ලා සහ හාරූන් නමැති ක්‍රීඩකයින් තිදෙනෙකු ඇතුළු උර්ගුන් දිස්ත්‍රික්කයේ තවත් සිවිල් වැසියන් පස් දෙනෙකු ජීවිතක්ෂයට පත්ව ඇති අතර, තවත් හත් දෙනෙකු තුවාල ලබා ඇත. ප්‍රහාරයට ලක්වන අවස්ථාවේ මෙම ක්‍රීඩකයින් පක්ටිකා පළාතේ අගනුවර වන ෂරානා වෙත ගොස් තිබුණේ සුහද ක්‍රිකට් තරගයකට සහභාගී වීම සඳහාය.
ඇෆ්ගනිස්තාන ක්‍රිකට් මණ්ඩලය නිකුත් කළ නිවේදනයක දැක්වෙන්නේ, මෙම ඛේදජනක සිදුවීමට ප්‍රතිචාරයක් ලෙසත්, මියගිය වින්දිතයින්ට ගෞරව කිරීමේ සංකේතයක් ලෙසත් නොවැම්බර් මස අගදී පාකිස්තානයේ පැවැත්වීමට නියමිතව තිබූ තුන්කොන් තරගාවලියෙන් ඉවත් වීමට තීරණය කළ බවයි.
“පාකිස්තාන පාලනය” විසින් සිදු කරන ලද මෙම “බියගුලු ප්‍රහාරය” හේතුවෙන් පක්ටිකා පළාතේ උර්ගුන් දිස්ත්‍රික්කයේ නිර්භීත ක්‍රිකට් ක්‍රීඩකයින්ගේ ඛේදජනක මරණය සම්බන්ධයෙන් තම මණ්ඩලය ගැඹුරු ශෝකය ප්‍රකාශ කරන බවද එම නිවේදනයේ වැඩිදුරටත් සඳහන් වේ.
මෙය ඇෆ්ගනිස්තානයේ ක්‍රීඩා ප්‍රජාවට, එහි ක්‍රීඩකයින්ට සහ සමස්ත ක්‍රිකට් පවුලටම විශාල පාඩුවක් ලෙස ACBය සලකයි. එමෙන්ම, මියගිය අයගේ පවුල්වලට සහ පක්ටිකා පළාතේ ජනතාවට තම බලවත් ශෝකය සහ සහයෝගීතාව පළ කරන බවද ඔවුන් කියා සිටී.
ඇෆ්ගනිස්තාන වමත් වේග පන්දු යවන ක්‍රීඩක ෆසාල්හක් ෆරූකි සිය නිල ෆේස්බුක් පිටුවේ සටහනක් තබමින් මෙම ක්‍රියාව “ම්ලේච්ඡ” එකක් ලෙස හඳුන්වා තිබේ. “පීඩකයන් විසින් අහිංසක සිවිල් වැසියන් සහ අපගේ දේශීය ක්‍රිකට් ක්‍රීඩකයින් ඝාතනය කිරීම සමාව දිය නොහැකි අපරාධයකි,” යනුවෙන් ඔහු සඳහන් කර ඇත.
දෙරට අතර පවතින වත්මන් නොසන්සුන්කාරී සබඳතා සැලකිල්ලට ගත් විට, අනාගතයේදී පැවැත්වෙන ජාත්‍යන්තර ක්‍රිකට් කවුන්සිල (ICC) තරගාවලිවලදී ඇෆ්ගනිස්තාන ක්‍රීඩකයින් පාකිස්තාන ක්‍රීඩකයින්ට අතට අත දීම පවා ප්‍රතික්ෂේප කරනු ඇතැයි බොහෝ දෙනා අදහස් පළ කරති.
