ඇය ගැන මේ ඇසෙන්නේ විශේෂ ආරංචියක්.. බොලිවුඩයේ බොහෝ දෙනෙක් මේ වෙනකොටත් ඒ කතාව නම් දන්නවා ඇති.
ඉන්දියාවේ අන්ද්‍රා ප්‍රදේශයේ පැවති ශ්‍රී සත්‍ය සායි බාබාගේ උපන් දින ශත සංවත්සර සැමරුම් උත්සවයට පැමිණ සිටි සුපිරි බොලිවුඩ් තරුවක මෙන්ම ලෝක රූ රැජිනක වන අයිශ්වර්යා රායි විසින් අග්‍රාමාත්‍ය නරේන්ද්‍ර මෝදිගේ දෙපා ස්පර්ශ කොට වඳින වීඩියෝවක් සමාජ ජාල තුළ දැඩි කතාබහට ලක්ව තිබෙනවා.
ඇය ඉන්දියාවේ ප්‍රබල කලා පරපුරකට සම්බන්ධ ලෝක ප්‍රකට කලාකාරිනියක් වන අතර මෝදි දේශපාලන චරිතයක් වීම ඊට හේතුව බවයි ඇතැමුන්ගේ මතය වී ඇත්තේ.
මෝදි ප්‍රධාන ආරාධිතයා වූ එම අවස්ථාවට අයිශ්වර්යා රායි බච්චන්, ක්‍රිකට් ක්‍රීඩක සචින් තෙන්ඩුල්කාර්, සහ මහඇමතිවරුන් වන රාම් මෝහන් නායිදු කින්ජාරපු සහ ජී. කිෂාන් රෙඩ්ඩි ඇතුළු බොහෝ සම්භාවනීය අමුත්තන් සහභාගී වුණා.
මෙම උත්සවයේ වීඩියෝ කිහිපයක් අන්තර්ජාලය ඔස්සේ වෛරසයක් මෙන් පැතිර යනවා.
අයිශ්වර්යා සභාව අමතා සිය කතාව කිරීමට පෙර ගෞරව දැක්වීමක් ලෙස ඇය අගමැති මෝදි වෙත ගොස් ඔහුගේ පාද වන්දනය කර තිබුණා.
අග්‍රාමාත්‍ය මෝදි ක්ෂණිකව ඇයව නවතා “නමස්තේ” කියා සිය කෘතඥතාව පළ කළා.
සිය කතාව අතරතුරදී ද අයිශ්වර්යා, අග්‍රාමාත්‍ය මෝදිට හෘදයාංගම ස්තූතියක් පිරිනැමූ අතර, ඇය කියා සිටියේ අද දින ඔහුගේ ඥානවන්ත, බලපෑම්සහගත සහ ආශ්වාදජනක වචන ඇසීමට බලාපොරොත්තු වන බවයි.
ඇය වැඩිදුරටත් අදහස් දක්වමින්, මෝදිගේ පැමිණීම මෙම සැමරුමට පිරිසිදු ආශ්වාදයක් එක් කරන බවත්, සැබෑ නායකත්වය යනු සේවය බවත්, මිනිසාට සේවය කිරීම දෙවියන්ට සේවය කිරීම බවත් වූ ස්වාමීන් වහන්සේගේ පණිවිඩය එයින් සිහිපත් වන බවත් පැවසුවා.
අයිශ්වර්යා සිය කතාවේදී කුලය, ආගම සහ ආදරය ගැන ද අදහස් දක්වමින් මෙසේ ප්‍රකාශ කළා.
“මිහිමත ඇත්තේ එකම කුලයක් පමණයි, ඒ මනුෂ්‍යත්වයේ කුලයයි. ඇත්තේ එකම ආගමක් පමණයි, ඒ ආදරයේ ආගමයි. ඇත්තේ එකම භාෂාවක් පමණයි, ඒ හදවතේ භාෂාවයි, ඇත්තේ එකම දෙවියෙක් පමණයි, ඔහු සර්ව ව්‍යාපීයයි.”
ඇය දිගු කලක් තිස්සේ මාධ්‍ය ආලෝකයෙන් ඈත් වී සිටි අතර, මෙවැනි මහජන උත්සවයකට සහභාගී වීම අතිශය දුර්ලභ අවස්ථාවක් බව එරට මාධ්‍ය වාර්තා සඳහන් කළා.
Source – Hiru Gossip
