චීන මෝටර් රථ නිෂ්පාදන දැවැන්තයෙකු වන BYD සමාගම වාර්තා කරන්නේ, පසුගිය වසරේ සැප්තැම්බර් මාසයට සාපේක්ෂව සිය එක්සත් රාජධානි අලෙවිය 880% ක දැවැන්ත වර්ධනයක් වාර්තා කර ඇති බවයි. මේ සමඟ චීනයෙන් පිටත සිය විශාලතම වෙළෙඳපොළ බවට එක්සත් රාජධානිය පත්ව තිබේ. පසුගිය සැප්තැම්බර් මාසයේදී පමණක් එම සමාගම එක්සත් රාජධානිය තුළ මෝටර් රථ 11,271ක් අලෙවි කර ඇති අතර, එම අලෙවියෙන් වැඩිම දායකත්වයක් ලබා දී ඇත්තේ එහි ‘සීල් යූ’ (Seal U) ප්ලග්-ඉන් හයිබ්රිඩ් වර්ගයේ ක්රීඩා උපයෝගිතා වාහනයයි.
මෙම වාර්තාගත අලෙවිය වාර්තා වන්නේ, එක්සත් රාජධානියේ මෝටර් රථ නිෂ්පාදකයින්ගේ සහ වෙළෙඳුන්ගේ සංගමයේ (SMMT) දත්ත වලට අනුව සැප්තැම්බර් මාසයේදී එරට විද්යුත් වාහන අලෙවිය ඉතිහාසයේ ඉහළම අගය සනිටුහන් කළ පසුබිමකය. යුරෝපා සංගමය සහ එක්සත් ජනපදය වැනි ප්රධාන වෙළෙඳපොළවල් මෙන් නොව, එක්සත් රාජධානිය චීන විද්යුත් වාහන සඳහා ආනයන බදු පනවා නොතිබීම,
BYD වැනි සමාගම්වලට එරට වඩාත් ආකර්ෂණීය වෙළෙඳපොළක් බවට පත්වීමට ප්රධාන හේතුවක් වී තිබේ.
බටහිර ප්රතිවාදී සමාගම්වලට වඩා අඩු මිලකට මෝටර් රථ මාදිලි හඳුන්වා දෙන BYD සමාගම සඳහන් කරන්නේ, සැප්තැම්බර් මාසයේදී එක්සත් රාජධානි වෙළෙඳපොළ තුළ සිය කොටස 3.6% දක්වා ඉහළ ගිය බවයි. සිය 100 වැනි සිල්ලර අලෙවි මධ්යස්ථානයද විවෘත කිරීමත් සමඟ ඉදිරි මාස කිහිපය තුළ තවත් නව හයිබ්රිඩ් සහ විද්යුත් මෝටර් රථ මාදිලි හඳුන්වා දීමට නියමිත බව BYD සමාගමේ එක්සත් රාජධානි කළමනාකරු වන බෝනෝ ගේ මහතා ප්රකාශ කළේය. ඔහු වැඩිදුරටත් සඳහන් කළේ සිය සන්නාමයේ බ්රිතාන්ය අනාගතය “ඉතා උද්යෝගිමත්” වනු ඇති බවයි.
මෝටර් රථ නිෂ්පාදකයින්ගේ සහ වෙළෙඳුන්ගේ සංගමයට අනුව, පසුගිය මාසයේදී සම්පූර්ණ බැටරි බලයෙන් ක්රියාත්මක වන විද්යුත් වාහන 73,000කට ආසන්න සංඛ්යාවක් අලෙවි වූ අතර ප්ලග්-ඉන් හයිබ්රිඩ් මෝටර් රථ අලෙවිය ඊටත් වඩා වේගවත් වර්ධනයක් පෙන්නුම් කර ඇත. සැප්තැම්බර් මාසයේදී Kia Sportage, Ford Puma සහ Nissan Qashqai වැඩියෙන්ම අලෙවි වූ මෝටර් රථ බවට පත් වූ අතර, චීන නිෂ්පාදන වන Jaecoo 7 සහ BYD Seal U යන මාදිලි ද වැඩියෙන්ම අලෙවි වූ මෝටර් රථ දහය අතරට පැමිණීම විශේෂත්වයකි.
කෙසේ වෙතත්, විද්යුත් වාහන අලෙවියේ මෙම කැපී පෙනෙන වර්ධනය මධ්යයේ වුවද, පසුගිය මාසයේ එක්සත් රාජධානියේ නව මෝටර් රථ අලෙවියෙන් අඩකටත් වඩා වැඩි ප්රමාණයක් පෙට්රල් සහ ඩීසල් වාහන විසින් හිමි කරගෙන ඇති බව SMMT දත්ත තවදුරටත් පෙන්වා දෙයි. චීන රජය විසින් ලබා දෙන අසාධාරණ සහනාධාර හේතුවෙන් යුරෝපීය මෝටර් රථ නිෂ්පාදකයින්ට සිදුවන බලපෑමෙන් ඔවුන්ව ආරක්ෂා කර ගැනීමේ අරමුණින් යුරෝපා සංගමය චීන විද්යුත් වාහන ආනයනය සඳහා 45% ක් දක්වා ඉහළ බදු පැනවීමට පසුගිය වසරේදී පියවර ගෙන තිබිණි.
ඉහළ තීරු බදු හේතුවෙන් BYD වැනි චීන මෝටර් රථ නිෂ්පාදකයින්ට එක්සත් ජනපද වෙළෙඳපොළට ඇතුළු වීමේ අවස්ථා ඵලදායී ලෙස ඇහිරී ගොස් ඇත. චීනය තුළ සිය අලෙවිය මන්දගාමී වී තිබුණද, BYD සමාගම ගෝලීය වශයෙන් සිය ඇමරිකානු ප්රතිවාදියා වන ටෙස්ලා සමාගමට මෙන්ම ජැගුවාර් සහ BMW වැනි යුරෝපීය ප්රතිවාදීන්ට වඩා සැලකිය යුතු ලෙස ඉදිරියෙන් සිටී.
මෙම වසරේ ජූලි මාසයේදී, විද්යුත් වාහන භාවිතය ප්රවර්ධනය කිරීමේ අරමුණින් එක්සත් රාජධානි රජය මෝටර් රථ මිලදී ගන්නන් සඳහා පවුම් මිලියන 650 ක වට්ටම් යෝජනා ක්රමයක් හඳුන්වා දෙන ලදී. එමඟින් Nissan, Peugeot සහ Vauxhall වැනි සන්නාම මිලදී ගැනීමේදී පවුම් 3,750 ක් දක්වා සහනාධාරයක් ලබා ගත හැකි වුවත්, නිෂ්පාදන ක්රියාවලියේදී සිදුවන විමෝචනයන් හේතුවෙන් චීනයේ නිෂ්පාදිත වාහන සඳහා මෙම සහනය හිමි නොවේ. මෙම තීරණය විවේචනයට ලක් කර ඇති BYD සමාගම පෙන්වා දෙන්නේ, එය දිගු කාලීනව එක්සත් රාජධානියේ මෝටර් රථ වෙළෙඳපොළට හානි පමුණුවනු ඇති බවයි.
(BBC ඇසුරිනි)
