බලංගොඩ ආනන්ද මෛත්රී මහා නාහිමියන් වහන්සේ අපවත්වීමට වසරකට පෙර, එනම් 1997 වර්ෂයේ ජූලි මස 07 වන දින බලංගොඩ උඩුමුල්ලේ ශ්රී නන්දාරාම විහාරස්ථානයේදී ඉතා සුවිශේෂී ධර්ම සාකච්ඡාවකට සහභාගී විය. නිස්සරණ වනය ආරණ්ය සේනාසනාධිපති උඩඊරියගම ධම්මජීව හිමියන් ඇතුළු විද්වත් පිරිසක් ඉදිරියේ පැවති මෙම සාකච්ඡාවේදී උන්වහන්සේ තමන් වහන්සේගේ පූර්ව ජන්මය සහ මෙම භවයට පැමිණීමේ අරමුණ පිළිබඳව ආන්දෝලනාත්මක හෙළිදරව්වක් සිදු කළහ. එහිදී උන්වහන්සේ මූලිකවම අවධාරණය කළේ වසවර්ති මාරයා යනු හුදෙක් සිතේ පවතින ක්ලේශයක් පමණක් නොව, එය බලවත් පුද්ගල ස්වභාවයක් සහිත දෙවියෙකු බවයි. කාමයට අධිපති මෙම මාරයා සහ ඔහුගේ පිරිස යහපත් මිනිසුන්ට සහ ශාසනික දියුණුවට නිරන්තරයෙන් බාධා කරන බවත්, සිද්ධාර්ථ ගෞතම බුදුරදුන්ට පවා බුදු වන මොහොතේ සිට පිරිනිවන් පාන මොහොත දක්වා මාරයාගෙන් බාධා එල්ල වූ බවත් උන්වහන්සේ පෙන්වා දුන්හ.
බුදුරජාණන් වහන්සේගේ පිරිනිවන් පෑමෙන් පසුව බුද්ධ ශාසනය විනාශ කිරීම සඳහා වසවර්ති මාරයා විසින් විශේෂ පිරිසක් මනුෂ්ය ලෝකයට එවීමට සැලසුම් කළ බව දිව්ය ලෝකයේ වැඩ සිටින මෛත්රී බෝධිසත්වයන් වහන්සේ දුටු බව නාහිමියන් සඳහන් කළහ. මෙම මාර බලපෑම මැඩපවත්වා බුද්ධ ශාසනය ආරක්ෂා කර ගැනීම සඳහා මෛත්රී බෝධිසත්වයන් විසින් දෙව්ලොව දිව්ය සභාවක් කැඳවා ඊට එරෙහිව ක්රියා කිරීමට සුදුසු කණ්ඩායමක් මනුෂ්ය ලෝකයට යැවීමට තීරණය කර ඇත. එම අවස්ථාවේදී තමන් වහන්සේ සිටියේ ඈත අහසේ දිලිසෙන කුඩා තාරකාවක් වන් දිව්ය ආත්මයක බවත්, එම සභාවට පැමිණෙන ලෙස මෛත්රී බෝධිසත්වයන් කළ ඉල්ලීම තමන් වහන්සේ තෙවරක්ම ප්රතික්ෂේප කළ බවත් නාහිමියන් විස්තර කළහ. තමන්ට වඩා බලවත් දෙවිවරුන් සිටියදී තමන් වැනි කුඩා දෙවියෙකු මෙම භාරදූර කාර්යයට නොගැලපෙන බව උන්වහන්සේගේ අදහස විය.
කෙසේ වෙතත් අවසානයේදී මෛත්රී බෝධිසත්වයන් වහන්සේ නාහිමියන්ගේ පෙර ආත්මයෙන් විමසා ඇත්තේ ඔබගේ ප්රාර්ථනාව කුමක්ද යන්නයි. තමන්ට ලොව්තුරා බුදු වීමට අවශ්ය බව පැවසූ විට, බුදු වීමට පෙරුම් පුරන කෙනෙකුට මෙවැනි ශාසනික මෙහෙවරක් මගහැරිය නොහැකි බවත්, මනුෂ්ය ලෝකයට ගොස් බුදු සසුන වෙනුවෙන් වැඩ කිරීම පාරමිතාවක් වන බවත් බෝධිසත්වයන් වහන්සේ පෙන්වා දී ඇත. ඒ අනුව මෛත්රී බෝධිසත්වයන්ගේ ඉල්ලීම පිළිගෙන තමන් මනුෂ්ය ලෝකයට පැමිණීමට එකඟ වූ බව නාහිමියන් ප්රකාශ කළහ. මෙම මෙහෙයුම සඳහා තමන්ට පෙර බලවත් කණ්ඩායමක් මනුෂ්ය ලෝකයට පිටත් කර යවා තිබූ බවත්, මිගෙට්ටුවත්තේ ගුණානන්ද හිමි, අනගාරික ධර්මපාලතුමා, හෙන්රි ස්ටීල් ඕල්කට්තුමා සහ වලිසිංහ හරිශ්චන්ද්ර වැනි අය එම කණ්ඩායමේ සාමාජිකයන් බවත් උන්වහන්සේ හෙළි කළහ. තමන් වහන්සේ එම කණ්ඩායමේ සිටි බාලම සාමාජිකයා ලෙස ලංකාවේ උපත ලැබූ බව උන්වහන්සේ සඳහන් කළහ.
තමන් වහන්සේගේ පෙර භවයන් පිළිබඳව තවදුරටත් කරුණු දැක්වූ නාහිමියන්, ඉන්දියාවේ හිමාල අඩවියේ “ගෞරි බාබා” නම් වූ යෝගියෙකු ලෙස වසර දහස් ගණනක් ජීවත් වූ බවත්, එම කාලයේදී කොළ සහ පළතුරු පමණක් ආහාරයට ගනිමින් සමථ භාවනාව දියුණු කළ බවත් ප්රකාශ කළහ. ඊට පෙර භවයකදී අශෝක අධිරාජ්යයාගේ දියණිය වූ සංඝමිත්තා තෙරණිය ශ්රී මහා බෝධිය ලංකාවට වැඩම කරවන අවස්ථාවේදී, එම බෝධි වෘක්ෂයට අරක් ගත් වෘක්ෂ දේවතාවා ලෙස සිටියේද තමන් බව උන්වහන්සේ හෙළි කළහ. බෝධි ශාඛාව කපා වෙන් කරන මොහොතේ එම වෘක්ෂ දේව ආත්මයෙන් චුත වී වෙනත් ආත්මයකට ගිය බව උන්වහන්සේගේ විස්තරයේ සඳහන් විය.
මෙම ආත්මයේදී ද තමන් වහන්සේ යෝග භාවනා දියුණු කරමින් දීර්ඝායුෂ ලබා ගැනීමට උත්සාහ කළද, වසවර්ති මාරයා ඊට බාධා කළ ආකාරය නාහිමියන් සංවේදීව විස්තර කළහ. 1983 වසරේදී උන්වහන්සේ භාවනා කරමින් සිටියදී පොළඟෙකු දෂ්ට කිරීම මාරයාගේ සැලැස්මක් බවත්, එම විෂ ශරීරගත වීම නිසා ඇති වූ රෝගී තත්ත්වය හේතුවෙන් මාස ගණනාවක් දුක් විඳීමට සිදු වූ බවත් උන්වහන්සේ පැවසූහ. එම අසනීප තත්ත්වය නිසා දීර්ඝ කාලයක් එක දිගට භාවනා කිරීමට තිබූ හැකියාව ගිලිහී ගිය බවත්, එසේ නොවුණා නම් තමන් වහන්සේට කල්පයක් වුවද ජීවත් වීමේ හැකියාව තිබූ බවත් උන්වහන්සේ සඳහන් කළහ. කෙසේ වෙතත්, තමන් බාරගත් ශාසනික මෙහෙවර දැන් ඉටු කර අවසන් බැවින් නැවත දිව්ය ලෝකයට යාමට අදහසක් නැති බවත්, ඊළඟ භවය ලංකාවේම ලබා බුදු වන තුරුම සසර ගමනේ යෙදෙමින් ලෝක සත්වයාට පිහිට වීමට බලාපොරොත්තු වන බවත් බලංගොඩ ආනන්ද මෛත්රී නාහිමියන් සිය හෙළිදරව්ව අවසන් කරමින් ප්රකාශ කළහ.
උපුටාගැනීම – විශ්ව කර්ම
