මහින්ද අලුත්ගෙදර
රටට සහ ජනතාවට සුබවාදී අනාගතයක් උදාකිරීම වෙනුවෙන් දිවිහිමියෙන් කටයුතු කරන බව ශ්රී ලංකා පොදුජන පෙරමුණේ ජාතික සංවිධායක සහ පාර්ලිමේන්තු මන්ත්රී නීතීඥ නාමල් රාජපක්ෂ මහතා ප්රකාශ කරයි.
වත්මන් ආණ්ඩුව රටේ ජනතාවට ලබාදුන් පොරොන්දු ඉටුකරවීම සඳහා බලකරන අතර මර්දනයට එරෙහිව සටන් කරන බව පෙන්වාදෙන ඒ මහතා ජනතාව වෙනුවෙන් අවංකවම පෙනී සිටින දේශපාලන පක්ෂ සියල්ල එළඹෙන 21දා නුගේගොඩට පැමිණෙනු ඇතැයි විශ්වාසය පළකරයි.
ඒ මහතා මේ බව සදහන් කළේ ශ්රී ලංකා පොදුජන පෙරමුණු පක්ෂ මූලස්ථානයේදී පැවති වැඩසටහනකින් අනතුරුව මාධ්ය වෙත අදහස් දක්වමිනි.
එහිදී වැඩිදුරටත් අදහස් දක්වමින් නාමල් රාජපක්ෂ මහතා මෙසේද කීය.
“සුන්බුන් එකතු කරලා හැදුවා කිවුවා. පාපිසි පාර්ලිමේන්තුවට ආවා කියලා ජනාධිපතිතුමා කිවුවා. නමුත් අපේ දේශපාලන බලවේගය තුළ සුන්බුන් සහ පාපිසි කෑලි නැහැ. අපි මේ රටේ ජනතාව වෙනුවෙන් පෙනී සිටිනවා. ජනතාවට ලබාදුන් පොරොන්දු ටික ඉටුකර ගන්න ආණ්ඩුවට නොහැකි වෙනකොට ඒක වෙනුවෙන් කතා කරන විපක්ෂය මර්දනය කරන්න කටයුතු කරනවා. ඒ මර්දනයට කෙඳිරි ගාන්නේ නැතිකොට ආණ්ඩුව කෙඳිරි ගානවා. දැන් ආණ්ඩුව කෙඳිරි ගාන්න පටන්ගෙන තිබෙනවා. ජනතාව වෙනුවෙන් පෙනී සිටින්න, ආණ්ඩුවේ මර්දනයට සහ බොරුවට එරෙහිව පෙනී සිටින්න, ආණ්ඩුව ජනතාවට ලබාදුන් පොරොන්දු ඉටුකරවීම සඳහා බලපෑමක් කරන්න සූදානම් ඕනෑම දේශපාලන පක්ෂයකට සහ කණ්ඩායමකට එළඹෙන 21 දා නුගේගොඩ දී පැවැත්වෙන රැස්වීමට සහභාගි වෙන්න පුළුවන්.
ඒ වගේම අපි සියලු දෙනාම එකතු වෙලා මේක සාර්ථක කර ගන්නවා. ජනතාවට ලබාදුන් පොරොන්දු ඉටුකරවන්න, මර්දනය නතර කරන්න ආණ්ඩුවට බලපෑම් කරන දැවැන්තම රැස්වීම බවට නුගේගොඩදී පැවැත්වෙන රැස්වීම පත්වෙනවා. ජනතාව වෙනුවෙන් අවංකවම පෙනී ඉන්න, අල ගොවියා ලූනු ගොවියා වෙනුවෙන් පෙනී ඉන්න, උපාධිධාරියා වෙනුවෙන් ගුරුවරයා වෙනුවෙන් හඩක් නඟන, ජීවන වියදමට එරෙහිව හඬක් නඟන ඕනෑම දේශපාලන පක්ෂයකට මේ රැස්වීමට සම්බන්ධ වෙන්න පුළුවන්. මේ ආණ්ඩුවට වැඩ බැරිනම් දන්න පිරිසක් ඒකරාශි කරගෙන මේ වැඩේ කරන්න ඕන. අපි ඒකට දොස් කියන්නේ නැහැ. ගොවියන්ට හොඳ මිලක් දෙන්න අපිට අවශ්යයි. ආණ්ඩුව මේක දන්නේ නැතිනම් දන්න කෙනෙක්ගෙන් අහගන්න ඕන.
Source – Dinamina
