ඉරානයේ විරෝධතාකරුවන්ට සහාය පළ කරමින් අමෙරිකාවෙන් ප්රහාරයක් එල්ල වන්නේ නම් මැදපෙරදිග රටවල ස්ථාපිත කර ඇති සියලුම අමෙරිකානු හමුදා ඉලක්ක වෙත ප්රතිප්රහාර එල්ල කරන බවට ඉරානය අනතුරු අඟවා තිබේ. අල් ජසීරා පුවත් සේවය සඳහන් කරන්නේ සෞදි අරාබිය සහ එක්සත් අරාබි එමීර් රාජ්යයත්, තුර්කිය ඇතුළු තවත් අරාබි රටවල් කිහිපයකත් පිහිටි අමෙරිකානු හමුදා ඉලක්ක වෙත එම ප්රහාර එල්ල වනු ඇතැයි ද ඉරානය ප්රකාශ කළ බව වාර්තා වේ. එවැනි ප්රහාර සිදු නොවීමට නම් ඉරානයට පහර දීමෙන් අමෙරිකාව වැළැක්වීමට පියවර ගන්නා ලෙසත් ඉරානය මැදපෙරදිග සෙසු මුස්ලිම් රටවලින් ඉල්ලීමක් කර තිබේ. ඉරාන රජය මේ ප්රකාශය සිදුකර ඇත්තේ රාජ්ය විරෝධී සිදුවීම් අතරතුර විරෝධතාකරුවන් ඝාතනය කිරීමට එරෙහිව හමුදාමය වශයෙන් මැදිහත්වන බවට ඩොනල්ඩ් ට්රම්ප් එල්ල කළ තර්ජනයට ප්රතිචාර දක්වමින් බව ද අල් ජසීරා පුවත් සේවය වැඩිදුරටත් වාර්තා කළේය.
අමෙරිකාවේ ප්රකාශය සම්බන්ධයෙන් එක්සත් ජාතීන්ගේ ඉරාන තානාපති අමීර් සයිඩ් ද ආරක්ෂක මණ්ඩලයට ලිපියක් යොමු කර ඇති අතර, ඉරානයේ විරෝධතාව අතරතුර තරුණ ජීවිත විශාල වශයෙන් අහිමිවීමට අමෙරිකාව සහ ඊශ්රායලය ප්රතික්ෂේප කළ නොහැකි නීතිමය වගකීමක් දැරිය යුතු බවය. ඉරානයේ අභ්යන්තර අර්බුදවලට මැදිහත් වීමට පෙර අමෙරිකාව අභ්යන්තරයේ ඇති ගැටලු විසඳා ගැනීමට ඩොනල්ඩ් ට්රම්ප් කටයුතු කළ යුතුව ඇතැයි ද ඔහු එම ලිපියෙහි සඳහන් කර ඇතැයි වාර්තා වේ.
උපුටාගැනීම – Dinamina
