ඉන්දියාව ඕවර 41.1ක් ඇතුළත ලකුණු 311ක ඉලක්කයක් හඹා යමින් අවුරුදු 19න් පහළ ලෝක කුසලාන ක්රිකට් නව වාර්තාවක් පිහිටුවා තිබෙනවා.
2026 වයස අවුරුදු 19න් පහළ ලෝක කුසලාන තරගාවලියේ අවසන් තරගයට පිවිසෙමින් ඉන්දියා කණ්ඩායම මේ හපන්කම ප්රදර්ශනය කළේ හරාරේ නුවර හරාරේ ක්රීඩා සමාජයීය ක්රීඩාංගණයේදී ඇෆ්ගනිස්තානය ට එරෙහිව බදාදා පැවති දෙවැනි අවසන් පූර්ව තරගයේ.
එහිදී ඒරන් ජෝර්ජ්ගේ ලකුණු 115ක ඉනිම ඉන්දියාව ට අමතක නොවන ජයග්රහණයක් ලබා දුන්නා පමණක් නොව වාර්තාගත 10 වැනි වතාටත් ඔවුන්ට අවුරුදු 19න් පහළ ලෝක කුසලානයේ අවසාන තරගයේ ස්ථානයක් ද හිමිකර දුන්නා.
ජෝර්ජ් ට අමතරව වයිභාව් සූර්යවන්ශි (පන්දු 33කින් ලකුණු 68) සහ අයුෂ් මහාත්රී (පන්දු 59කින් ලකුණු 62) ද ඉලක්කය හඹා යාමේදී කැපී පෙනුනු පිතිකරණයක නිරත වුණා.
මීට අමතරව, ඉන්දියාව මේ ලෝක කුසලාන ඉතිහාසයේ වැඩිම සාර්ථක ලකුණු හඹා යාමේ වාර්තාව ද බිඳ දැමුවා.
මේ දක්වා, ඉන්දියාව හා නවසිලන්තය යන කණ්ඩායම් දෙක පමණයි අවුරුදු 19න් පහළ ලෝක කුසලාන තරගයක ලකුණු 300ක් හෝ ඊට වැඩි ඉලක්කයක් සාර්ථකව හඹා යාමට සමත්ව සිටින්නේ.
2006 වසරේ පෙබරවාරි 14 වැනිදා කොළඹදී අයර්ලන්තය ට එරෙහිව නවසිලන්තය කඩුලු 3ක ජයග්රහණයක් තහවුරු කිරීම පිණිස ඕවර 49.1කදී ලකුණු 305ක ඉලක්කය හඹා ගියා. එම වාර්තාව වසර 20ක් ම පැවතුනද දැන් එය අයත්ව තිබෙන්නේ ඉන්දියාව ට.
අවුරුදු 19න් පහළ ලෝක කුසලානයේ වැඩිම සාර්ථක ලකුණු හඹායාම්
ඉන්දියාව ඇෆ්ගනිස්තානය ට එරෙහිව ඕවර 41.1කින් ලකුණු 311/3 (ඉලක්කය 311)
නවසිලන්තය අයර්ලන්තය ට එරෙහිව ඕවර 49.1කින් ලකුණු 305/7 (ඉලක්කය 305)
දකුණු අප්රිකාව බංග්ලාදේශය ට එරෙහිව ඕවර 48.5කින් ලකුණු 298/8 (ඉලක්කය 294)
බටහිර ඉන්දීය කොදෙව් පිල ශ්රී ලංකාව ට එරෙහිව ඕවර 48.3කින් ලකුණු 294/6 (ඉලක්කය 292)
බටහිර ඉන්දීය කොදෙව් පිල අයර්ලන්තය ට එරෙහිව ඕවර 48.2කින් ලකුණු 281/6 (ඉලක්කය 279)
(සටහන : වර්නන් ගුණසේකර)
ජ්යෙෂ්ඨ මාධ්යවේදී
