2025 ඔක්තෝබර් 19 වන දින පැරිසියේ ලූවර් කෞතුකාගාරයේ සිදු වූ මහා ස්වර්ණාභරණ මංකොල්ලයට අදාළව තවත් නව සැකකරුවන් පස් දෙනෙකු ප්‍රංශ පොලිසිය විසින් අත්අඩංගුවට ගෙන තිබේ. මෙම නව රැඳවූවන් අතර, DNA සාක්ෂි මගින් සොරකම හා සෘජුවම සම්බන්ධ යැයි හඳුනාගත් ප්‍රධාන සැකකරුවෙකු ද වන බව වාර්තා වේ. පැරිසිය සහ ඒ අවට ප්‍රදේශවල, විශේෂයෙන් සේන්-සන්-ඩෙනි කලාපයේ සිදුකළ මෙහෙයුම්වලදී මොවුන් අත්අඩංගුවට ගෙන ඇත.
මීට පෙර මෙම සිදුවීම සම්බන්ධයෙන් අත්අඩංගුවට ගත් තවත් සැකකරුවන් දෙදෙනෙකු, තමන් මෙම මංකොල්ලයට සම්බන්ධ වූ බවට “අර්ධ වශයෙන් පිළිගෙන” තිබූ අතර, ඔවුන් මේ වන විට රක්ෂිත බන්ධනාගාරයේ පසුවේ. පැරිස් නඩු පවරන්නා සඳහන් කළේ මෙම පළමු සැකකරුවන් දෙදෙනා සංවිධානාත්මක සොරකම් කිරීම සහ සාපරාධී කුමන්ත්‍රණ චෝදනා යටතේ විධිමත් විමර්ශනයකට ලක් කර ඇති බවයි. 34 හැවිරිදි ඇල්ජීරියානු ජාතිකයෙකු වන එක් සැකකරුවෙකු, රටින් පලා යාමට උත්සාහ කිරීමේදී චාල්ස් ඩි ගෝල් ගුවන්තොටුපළේදී අත්අඩංගුවට පත්වූ අතර, ඔහුගේ DNA සොරකම සඳහා යොදාගත් ස්කූටරයක තිබී හමුවී ඇත. 39 හැවිරිදි අනෙක් සැකකරුගේ DNA, කෞතුකාගාරයේ බිඳ දැමූ ප්‍රදර්ශන කුටියක වීදුරු කැබලිවල තිබී සොයා ගැනිණි.
මෙම සැකකරුවන්, ලූවර් කෞතුකාගාරයේ ඇපලෝ ගැලරිය වෙත බල මෙවලම් භාවිතා කරමින් කඩා වැදී ඇති පුළුල් කණ්ඩායමක සාමාජිකයින් බව විශ්වාස කෙරේ. ට්‍රක් රථයක සවිකළ ඉණිමඟක් භාවිතයෙන් ජනේලයක් හරහා ගැලරියට ඇතුළු වී ඇති සොරුන්, විනාඩි හතක් වැනි කෙටි කාලයක් තුළ මෙම සොරකම සිදු කර ඇත.
ඔවුන් විසින් ඩොලර් මිලියන 102ක් (යුරෝ මිලියන 88ක්) පමණ වටිනා ප්‍රංශ රාජකීය ආභරණ අටක් සොරකම් කර ඇත. මෙම ආභරණ අතර නැපෝලියන් විසින් සිය දෙවන බිරිඳට තෑගි කළ දියමන්ති දහසකට අධික මරකත මාලයක් සහ මාරි-ඇමලී රැජින පැළඳි දියමන්ති සහ නිල් මැණික් කට්ටලයක් ද වන බව සඳහන් වේ.
සැකකරුවන් කිහිප දෙනෙකු අත්අඩංගුවට ගෙන ඇතත්, සොරකම් කරන ලද මෙම වටිනා ආභරණ මෙතෙක් සොයාගෙන නොමැති බව පැරිස් නඩු පවරන්නාගේ කාර්යාලය තහවුරු කර තිබේ. විමර්ශකයින් 100 කට අධික සංඛ්‍යාවක් මෙම පරීක්ෂණයට සම්බන්ධ වී ඇති අතර, DNA සාම්පල 150 කට අධික ප්‍රමාණයක් විශ්ලේෂණය කර ඇත. කෞතුකාගාරයේ අභ්‍යන්තර ආධාරයක් මෙම සොරකමට ලැබී ඇති බවට මෙතෙක් කිසිදු සාක්ෂියක් අනාවරණය වී නොමැත. අතුරුදන් වූ ආභරණ සොයා ගැනීම සහ මෙම මංකොල්ලයට සම්බන්ධ සම්පූර්ණ කණ්ඩායම හෙළිදරව් කර ගැනීම සඳහා පරීක්ෂණ අඛණ්ඩව ක්‍රියාත්මක වේ.
