ගංවතුරට හසු වූ නිවාස පවිත්ර කර ගැනීම සඳහා රජයෙන් ලබා දෙන රුපියල් 25,000ක දීමනාව මෙම සතිය තුළ මුදල් ගෙවා අවසන් කරන ලෙස ජනාධිපති අනුර කුමාර දිසානායක මහතා නිලධාරීන්ට උපදෙස් දුන්නේය.
මධ්යම කඳුකරය රැකගැනීම සඳහා ස්ථීර විසඳුමක් සෙවීමේ රජයේ වැඩපිළිවෙළ යටතේ මේ වනවිට අවදානම් කලාපයේ පවතින නිවාස 15,000ක් හඳුනාගෙන තිබෙන බව සඳහන් කළ ජනාධිපතිවරයා, 2026 වසර අවසන් වනවිට එම ජනතාව වෙනුවෙන් ඉදිවන නිවාස 8,000ක කටයුතු සම්පූර්ණ කිරීමට අපේක්ෂා කරන බවද සඳහන් කළේය.
ජනාධිපතිවරයා එම අදහස් පළ කළේ, ව්යසන කළමනාකරණය සඳහා වූ ජාතික සභාවේ 16 වන සභා වාරයට සහභාගි වෙමිනි. එය ජනාධිපති අනුර කුමාර දිසානායක මහතාගේ ප්රධානත්වයෙන් ජනාධිපති ලේකම් කාර්යාලයේදී ඊයේ (15) පෙරවරුවේ පැවැත්විණි. ජාතික ආපදා කළමනාකරණ ඒකාබද්ධ යන්ත්රණයක් සැකසීම සහ 2005 අංක 13 දරන ශ්රී ලංකා ව්යසන කළමනාකරණ පනත සංශෝධනය කිරීමට අදාළ පත්රිකාව සභාගත කිරීම ද මෙහිදී සිදු විය.
2016 වසරේ සිදු වූ ගංවතුර හේතුවෙන් හානි පූර්ණය සඳහා රුපියල් බිලියන 7.51ක් ජනතාවට ලබා දුන් නමුත්, ප්රතිරක්ෂණ ප්රතිසාධනය සිදුව ඇත්තේ රුපියල් බිලියන 1.42ක් බැවින්, එහිදී රජයට රුපියල් බිලියන 5.79ක පාඩුවක් සිදුව ඇති බව මුදල් අමාත්යාංශය හඳුනාගෙන තිබෙන බව මුදල් අමාත්යාංශයේ ලේකම් ආචාර්ය හර්ෂණ සූරියප්පෙරුම මහතා මෙහිදී අනාවරණය කළේය.
එම රක්ෂණ ක්රමය ඉදිරියට පවත්වාගෙන යන්නේ නම් එය රජයට වාසි සහගත සහ ප්රතිලාභීන්ගේ ආරක්ෂාව උපරිමයෙන් සැලසෙන පරිදි වන රක්ෂණ ක්රමයක් විය යුතු බවත්, එය නැවතත් ආරම්භ කරන්නේ නම් විශේෂඥ උපදෙස් ලබාගෙන එහි අත්යවශ්ය සංශෝධන සිදු කළ යුතු බවත් ජනාධිපතිවරයා පෙන්වා දුන්නේය.
බහු-පාර්ශ්වික ප්රවේශයක් තුළින් වතු ප්රදේශවල නාය යෑම් අවදානම අවම කිරීම සඳහා NBRO විසින් අදාළ පාර්ශ්වකරුවන්, වතු හිමියන් සහ පළාත් පාලන ආයතන අතර සම්බන්ධීකරණයෙන් ජලාපවහන පද්ධතිය ඉදිකිරීම, ප්රතිසංස්කරණය ඇතුළු ක්රියාකාරීත්වයන් සඳහා නිර්දේශ ලබාදීම සහ සහතික කිරීමේ යන්ත්රණයක් ස්ථාපිත කිරීම පිළිබඳවද මෙහිදී අවධානය යොමු කෙරිණි.
එමෙන්ම, මධ්යම අධි සංවේදී කලාප (Central Fragile Area) කළමනාකරණ සැලැස්මක් සකස් කිරීමට අදාළව තාක්ෂණික කණ්ඩායම් පිහිටුවීම සහ අදාළ සියලු ආයතනවල තොරතුරු ඒකාබද්ධ කරගත් සැලැස්මක් සකස් කිරීමටත්, එම දත්තවලට සියලු ආයතනවලට ප්රවේශ විය හැකි ආකාරයේ ඒකාබද්ධ ඩිජිටල් වේදිකාවක් සකස් කිරීම පිළිබඳවත් අවධානය යොමු විය.
විනිවිදභාවය තහවුරු කරමින් ලැබෙන සියලුම විදේශ සහනාධාර (සැපයුම්) සම්බන්ධීකරණයට අදාළව විදේශ සහනාධාර සම්බන්ධීකරණය සඳහා වන කමිටුව ස්ථාපිත කිරීම සඳහා අනුමැතිය ලබා දීම සහ ඊට අදාළ බලතල පැවරීම පිළිබඳව ද සාකච්ඡා කෙරිණි.
ව්යසන කළමනාකරණය සඳහා වූ ජාතික සභාව වසර 07කට පසුව පසුගිය අගෝස්තු 07 වැනිදා ජනාධිපතිවරයාගේ ප්රධානත්වයෙන් රැස්වූ අතර, හදිසි ආපදා තත්ත්වය සමඟ නොවැම්බර් 27 වැනිදා රාත්රියේ නැවත රැස් විය. දිට්වා සුළි කුණාටුවෙන් පසු ජන ජීවිතය සාමාන්ය තත්ත්වයට ගෙන ඒම වෙනුවෙන් අවශ්ය ප්රතිපත්තිමය තීන්දු තීරණ ගනිමින් ආයතනික මඟපෙන්වීම වෙනුවෙන් එය ඊයේ මෙලෙස ජනාධිපතිවරයාගේ ප්රධානත්වයෙන් රැස් විය.
දිවයින පුරා පුද්ගලයන් මිලියන 2.2ක් දිට්වා සුළි කුණාටුව හේතුවෙන් බලපෑමට ලක්ව සිටින අතර පූර්ණ නිවාස හානි 6,164ක් සහ අර්ධ නිවාස හානි 112,110ක් සිදුව තිබේ. ඒ අනුව සුරක්ෂිත මධ්යස්ථාන 796ක, පුද්ගලයන් 72,911ක් 14 දින වනවිට රැඳී සිටින බව ආපදා කළමනාකරණ අධ්යක්ෂ ජනරාල්වරයා මෙහිදී සඳහන් කළේය. එම ජනතාවට සහන සැලසීම, යළි පදිංචි කිරීම සහ ජීවනෝපාය මාර්ග යළි ගොඩනඟමින් ජන ජීවිතය සාමාන්ය තත්ත්වයට පත් කිරීම වෙනුවෙන් ආරම්භ කර ඇති වැඩපිළිවෙළ පිළිබඳ මෙහිදී පුළුල් ලෙස සාකච්ඡා කෙරිණි.
ගංවතුරට හසු වූ නිවාස පවිත්ර කර ගැනීම සඳහා රජයෙන් ලබා දෙන රුපියල් 25,000ක දීමනාව ලබාදීමේදී මතුව ඇති ගැටලු පිළිබඳවද මෙහිදී අවධානය යොමු කෙරුණු අතර එම ගැටලු විසඳා ගනිමින් මෙම සතිය තුළ අදාළ මුදල් ගෙවා අවසන් කරන ලෙස ද ජනාධිපති අනුර කුමාර දිසානායක මහතා නිලධාරීන්ට උපදෙස් දුන්නේය.
දත්ත රැස් කිරීමේදී සහ යාවත්කාලීන කිරීමේදී මතුව ඇති ගැටලු පිළිබඳව විශේෂ අවධානයක් යොමු කෙරුණු අතර එම කටයුතු සඳහා විධිමත් ක්රියාවලියක අවශ්යතාව මෙහිදී ජනාධිපතිවරයාගේ අවධානයට යොමු විය. ඒ වෙනුවෙන් නීති සම්පාදනයේ අවශ්යතාව මෙන්ම, ප්රායෝගික වැඩපිළිවෙළක් තුළින් ඉදිරි වසර 03 තුළදී එම ගැටලුව සඳහා විසඳුම් සෙවීමේ අවශ්යතාව ජනාධිපතිවරයා අවධාරණය කළේය.
අග්රාමාත්ය ආචාර්ය හරිනි අමරසූරිය, විපක්ෂ නායක සජිත් ප්රේමදාස, විදේශ කටයුතු, විදේශ රැකියා සහ සංචාරක අමාත්ය විජිත හේරත්, කෘෂිකර්ම, පශු සම්පත්, ඉඩම් සහ වාරිමාර්ග අමාත්ය කේ.ඩී. ලාල්කාන්ත, සෞඛ්ය සහ ජනමාධ්ය අමාත්ය වෛද්ය නලින්ද ජයතිස්ස, මහජන ආරක්ෂක සහ පාර්ලිමේන්තු කටයුතු අමාත්ය ආනන්ද විජේපාල, රාජ්ය පරිපාලන, පළාත් සභා සහ පළාත් පාලන අමාත්ය ඒ.එච්.එම්.එච්. අභයරත්න, නිවාස, ඉදිකිරීම් හා ජලසම්පාදන අමාත්ය සුසිල් රණසිංහ, බලශක්ති අමාත්ය කුමාර ජයකොඩි, ප්රවාහන සහ මහාමාර්ග අමාත්ය බිමල් රත්නායක, ග්රාමීය සංවර්ධන, සමාජ ආරක්ෂණ සහ ප්රජා සවිබල ගැන්වීම් අමාත්ය උපාලි පන්නිලගේ, අධිකරණ සහ ජාතික ඒකාබද්ධතා අමාත්ය හර්ෂණ නානායක්කාර, ධීවර, ජලජ සහ සාගර සම්පත් අමාත්ය රාමලිංගම් චන්ද්රසේකර්, කර්මාන්ත සහ ව්යවසායකත්ව සංවර්ධන අමාත්ය සුනිල් හඳුන්නෙත්ති, ආරක්ෂක නියෝජ්ය අමාත්ය මේජර් ජෙනරාල් (විශ්රාමික) අරුණ ජයසේකර, බස්නාහිර පළාත් ආණ්ඩුකාර හනීෆ් යූසුෆ්, වයඹ පළාත් ආණ්ඩුකාර තිස්ස වර්ණසූරිය, මධ්යම පළාත් ආණ්ඩුකාර මහාචාර්ය එස්.බී.එස්. අබේකෝන්, සබරගමුව පළාත් ආණ්ඩුකාර චම්පා ජානකී රාජරත්න, නැඟෙනහිර පළාත් ආණ්ඩුකාර ජයන්ත ලාල් චන්ද්රසේකර, උතුරු මැද පළාත් ආණ්ඩුකාර වසන්ත කුමාර විමලසිරි, උතුරු පළාත් ආණ්ඩුකාර නාගලිංගම් චේතනායහන්, ඌව පළාත් ආණ්ඩුකාර කපිල ජයසේකර මහත්වරු ද, විපක්ෂයේ පාර්ලිමේන්තු මන්ත්රීවරුන් වන එස්.එම්. මරික්කාර්, බී. ආරියවංශ, පත්මනාදන් සත්යලිංගම්, අනුරාධ ජයරත්න, උදුමාලෙබ්බේ මහත්වරුද, ආරක්ෂක අමාත්යාංශයේ ලේකම් එයාර් වයිස් මාර්ෂල් (විශ්රාමික) සම්පත් තුයියකොන්තා, මුදල් අමාත්යාංශයේ ලේකම් ආචාර්ය හර්ෂණ සූරියප්පෙරුම, අත්යවශ්ය සේවා කොමසාරිස් ජනරාල් වැවිලි සහ ප්රජා යටිතල පහසුකම් අමාත්යාංශයේ ලේකම් ප්රභාත් චන්ද්රකීර්ති, රාජ්ය පරිපාලන, පළාත් සභා සහ පළාත් පාලන අමාත්යාංශයේ ලේකම් එස්. ආලෝක බණ්ඩාර, කාලගුණ විද්යා දෙපාර්තමේන්තුවේ අධ්යක්ෂ ජනරාල් ඒ.කේ. කරුණානායක, ආපදා කළමනාකරණ මධ්යස්ථානයේ අධ්යක්ෂ ජනරාල් මේජර් ජෙනරාල් සම්පත් කොටුවේගොඩ මහත්වරු සහ ත්රිවිධ හමුදාපතිවරුන් ඇතුළු ආරක්ෂක අංශ ප්රධානීහු සහ රාජ්ය නිලධාරීහු ද මෙම අවස්ථාවට එක්ව සිටියහ.
උපාලි කරුණාරත්න
Source – Dinamina
