පාකිස්තානයේ හිටපු අග්‍රාමාත්‍ය ඉම්රාන් ඛාන්ගේ සොහොයුරියන් රාවල්පින්ඩි පොලිසිය විසින් පාර දිගේ ඇදගෙන ගොස් අඩන්තේට්ටම් සිදු කර තිබේ. බන්ධනාගාරයේ සිටින තම සොහොයුරා බැලීම සඳහා පැමිණි අවස්ථාවේදී ඔවුන්ට මෙම අවාසනාවන්ත සිදුවීමට මුහුණ දීමට සිදුව ඇත්තේ ඔවුන්ව බලහත්කාරයෙන් අත්අඩංගුවට ගැනීමට පොලිසිය කටයුතු කිරීමත් සමඟය.
මාධ්‍ය වාර්තා පවසන ආකාරයට මෙම සිදුවීම වාර්තා වී ඇත්තේ අඩියාල් බන්ධනාගාරය ඉදිරිපිටදී වන අතර, ඉම්රාන් ඛාන්ගේ සොහොයුරියන් වන අලීමා, නෝරීන් සහ උස්මා සතිපතා ලබා දෙන අවස්ථාවට අනුව තම සොහොයුරා හමුවීමට පැමිණි නමුත් බන්ධනාගාර බලධාරීන් ඊට ඉඩ ලබා දී නොමැත.
ඉම්රාන් ඛාන්ගේ පක්ෂය වන PTI පක්ෂය ‘X’ පණිවිඩයක් නිකුත් කරමින් ප්‍රකාශ කර සිටියේ තම පක්ෂ නායකයාගේ සොහොයුරියන් බන්ධනාගාරය ඉදිරිපිට සාමකාමීව අසුන්ගෙන සිටියදී පොලිසිය මැදිහත් වී ඔවුන්ව බලහත්කාරයෙන් ඉවත් කිරීමට උත්සාහ කළ බවයි.
ඛාන්ගේ සොහොයුරියන්ට පමණක් නොව, කයිබර් පළාත් අමාත්‍ය මීනා ඛාන් අෆ්රිඩි, පාර්ලිමේන්තු මන්ත්රී ෂාහිඩ් ඛට්ටක් සහ තවත් කාන්තා ක්‍රියාකාරීන් රැසකට ද පොලිසිය විසින් පහර දී ඇති බව පක්ෂය චෝදනා කරයි. අධිකරණය මගින් ඉම්රාන් ඛාන් හමුවීමට පවුලේ අයට අවසර ලබා දී තිබියදීත්, වත්මන් රජය එම හමුවීම් වැළැක්වීම සඳහා පීඩනය යොදමින් කටයුතු කරන බව PTI පක්ෂය වැඩිදුරටත් පෙන්වා දෙයි.
පක්ෂය විසින් නිකුත් කරන ලද වීඩියෝ දර්ශනවල අලීමා සහ උස්මා විසින් දැඩි කම්පනයට පත්ව සිටින නෝරීන්ව සනසන අයුරු දැකගත හැකි අතර, තමන්ව පාර දිගේ ඇදගෙන ගිය බව අලීමා එහිදී ප්‍රකාශ කරයි. තවත් වීඩියෝවක අදහස් දක්වන නෝරීන් පවසන්නේ කාන්තා පොලිස් නිලධාරිනියන් විසින් තම හිසකෙස්වලින් ඇද බිම දමා පහර දුන් බවත්, සාමකාමීව සිටි තමන්ට හදිසියේම මෙලෙස පහර දුන්නේ මන්දැයි වටහා ගත නොහැකි බවත්ය.
ඉම්රාන් ඛාන් මේ වන විට නඩු 100කට අධික සංඛ්‍යාවකට මුහුණ දෙමින් සිටින අතර 2023 අගෝස්තු මාසයේ සිට බන්ධනාගාරගතව සිටියි. රාජ්‍ය දේපළ අවභාවිතය සහ රාජ්‍ය රහස් හෙළි කිරීම වැනි චෝදනා යටතේ ඔහුට වසර 14ක සිර දඬුවමක් නියම වී ඇති අතර, අල්-කදීර් භාරය සඳහා රජයේ ඉඩම් අඩු මිලට විකිණීම සම්බන්ධයෙන් ද ඔහුට එරෙහිව චෝදනා එල්ල වී තිබේ. මෙම සිදුවීම් මාලාව සහ ඔහු අත්අඩංගුවට ගැනීමත් සමඟ මීට පෙර රට පුරා හමුදා කඳවුරු ඉලක්ක කර ගනිමින් ප්‍රචණ්ඩ ක්‍රියා හටගත් ඉතිහාසයක් ද පවතී.
Source – Gossip Lanka News
