චෝදනා ලබා සිරගතව සිටින පාතාල නායක මූල්ය වංචාකාරයෙකු වන සුකේෂ් චන්ද්රසේකර් සම්බන්ධ ඉන්දීය රුපියල් කෝටි 200ක මුදල් විශුද්ධිකරණ නඩුවට අදාළව තමන්ට එරෙහිව ගොනු කර ඇති නඩුව නිෂ්ප්රභ කරන ලෙස ඉල්ලා බොලිවුඩ් නිළි ජැකලින් ෆර්නැන්ඩස් විසින් අද (22) ඉන්දීය ශ්රේෂ්ඨාධිකරණයට ඉදිරිපත් කළ පෙත්සම මැදිහත් වීමට නොහැකි බව දක්වා ඉන්දීය ශ්රේෂ්ඨාධිකරණය එය අද ප්රතික්ෂේප කළේය.
මෙම ඉල්ලීම මීට පෙර දිල්ලි මහාධිකරණයද ඉවත දැමූ අතර, එම නියෝගය බල රහිත කරන ලෙස කළ ඉල්ලීම මෙලෙස ශ්රේෂ්ඨාධිකරණය විසින්ද නොසලකා හැර තිබේ. ශ්රේෂ්ඨාධිකරණ විනිසුරු මඩුල්ල ජැකලින්ගේ නීතිඥවරයාට දැනුම් දුන්නේ මෙම අදියරේදී අධිකරණය මැදිහත් නොවන නමුත්, නඩු විභාගයේ සුදුසු අවස්ථාවකදී විරෝධතා ඇති නම් අධිකරණය වෙත කරුණු දැක්වීමට ඇයට අවසර ඇති බවය.
මෙම අධිකරණ තීන්දුවත් සමඟ ජැකලින් ෆර්නැන්ඩස්ට එරෙහි නඩුව මූල්ය විශුද්ධිකරණ අධිකරණය තුළ අඛණ්ඩව විභාගයට ගැනෙනු ඇත.
සුකේෂ් චන්ද්රසේකර්ගෙන් සුඛෝපභෝගී තෑගි භාරගැනීම තුළින් ඇය මෙම මුදල් විශුද්ධිකරණ ක්රියාවලියට සම්බන්ධ වී ඇති බවට චෝදනා එල්ල වී තිබේ. ඉන්දීය බලාත්මක කිරීමේ අධ්යක්ෂ මණ්ඩලය (ED) චෝදනා කරන්නේ රුපියල් කෝටි 7ක් පමණ වටිනා ආභරණ, ඇඳුම් පැළඳුම් සහ වාහන වැනි ත්යාග රැසක් චන්ද්රසේකර්ගේ අපරාධකාරී පසුබිම දැන දැනම ඇය විසින් ලබාගෙන ඇති බවයි. මෙම තෑගි අපරාධ ක්රියාකාරකම් තුළින් උපයාගත් මුදල්වලින් ලබාදුන් ඒවා බවට විමර්ශන අංශ සැක පහළ කරයි.
බලාත්මක කිරීමේ අධ්යක්ෂ මණ්ඩලය විසින් ගොනු කර ඇති අධිචෝදනා පත්රයේ ජැකලින් සම-විත්තිකාරියක් ලෙස නම් කර තිබේ. චන්ද්රසේකර් අත්අඩංගුවට ගැනීමෙන් පසුව ඇය සිය ජංගම දුරකථනයෙන් දත්ත මකා දැමූ බවටත්, ඔහු හා සම්බන්ධ මූල්ය ගනුදෙනු මුලදී වසන් කළ බවටත් චෝදනා පවතී. කෙසේ වෙතත්, මෙම සියලු චෝදනා ප්රතික්ෂේප කරන ජැකලින් ෆර්නැන්ඩස්ගේ නීතිඥයින් පෙන්වා දෙන්නේ ඇයව මෙම නඩුවට අසත්ය ලෙස ගොනු කර ඇති බවත්,
චන්ද්රසේකර්ගේ නීති විරෝධී ක්රියාකාරකම් පිළිබඳව ඇයට කිසිදු දැනුමක් නොතිබූ බවත්ය.
ශ්රේෂ්ඨාධිකරණයේ තීන්දුවත් සමඟ, ජැකලින්ට ඉදිරියේදී අධිකරණයේ නඩු කටයුතුවලට මුහුණ දීමට සිදුවනු ඇත. එහිදී පැමිණිල්ල විසින් ඉදිරිපත් කරන සාක්ෂි අභියෝගයට ලක් කිරීමට සහ සිය නිර්දෝෂීභාවය ඔප්පු කිරීමට ඇයගේ නීති කණ්ඩායමට අවස්ථාව හිමිවේ. අධිකරණයේ තීන්දුව අවාසිදායක වුවහොත්, මහාධිකරණය හෝ ශ්රේෂ්ඨාධිකරණය වැනි ඉහළ අධිකරණ වෙත අභියාචනා ඉදිරිපත් කිරීමට ඇයට නීතිමය ප්රතිපාදන පවතී. නීතිමය ක්රියාමාර්ග ලිහිල් කරගැනීමේ අරමුණින් විමර්ශන ආයතන සමඟ සහයෝගයෙන් කටයුතු කරන ලෙස ඇයගේ නීති උපදේශකයින් උපදෙස් ලබා දිය හැකි බවද වාර්තා වේ.
Gossip Lanka News
