මියන්මාරයේ බෞද්ධ ආරාමයකට එල්ල වූ ගුවන් ප්රහාරයකින් ළමුන් 4 දෙනෙකු ඇතුළුව පුද්ගලයින් 23 දෙනෙකු මියගොස් ඇති බව විදෙස් වාර්තා සඳහන් කරයි.
එරට දෙවන විශාලතම නගරය වන මැන්ඩලේ සිට කිලෝමීටර් 35ක් පමණ වයඹ දෙසින් පිහිටි සගායිං නගරයේ ලින් ටා ලූ ගම්මානයේ පිහිටි ආරමයකට මෙම ප්රහාරය එල්ල වී ඇත.
ගුවන් ප්රහාරයට එල්ලවන විට මෙම ආරාමයේ 150කට වැඩි පිරිසක් නවාතැන් ගෙන සිට ඇති අතර, ඒ හේතුවෙන් මරණ සංඛ්යාව තවත් ඉහළ යා හැකි බව වාර්තා වේ.
කෙසේ වෙතත් මෙම ප්රහාරය එල්ලවී ඇත්තේ පෙරේදා (10) අලුයම 1ට පමණ වුවත්, එය විදෙස් මාධ්යවෙත අනාවරණය වී ඇත්තේ අද (12) දිනයේය.
මියන්මාරයේ වත්මන් පාලනය දරන හමුදා රජයට එරෙහිව සටන්කරන ප්රධාන බලකොටුවක් ලෙස සගායිං ප්රදේශය සැලකේ.
ඒ හේතුවෙන් එරට හමුදාවට එරෙහිව සගායිං හි ප්රදේශීය කණ්ඩායම් සටන්වදින අතර, ඊට ප්රතිචාර ලෙස හමුදා ජෙට් යානයක් මෙම ආරාම ගොඩනැගිල්ලට බෝම්බයක් හෙළූ බව කැරළි කණ්ඩායමක සාමාජිකයෙක් විදෙස් මාධ්ය වෙත පවසා තිබේ.
Ada Derana
