හන්ස් රැඩෙලොෆ් නමැති ස්විස් ජාතිකයාගේ ඝාතනය සම්බන්ධයෙන් චෝදනා ලැබ සිටි පුද්ගලයකු තංගල්ල මහාධිකරණය විසින් නිදොස් කොට නිදහස් කර තිබේ. මෙම ඝාතනය සිදුවී තිබුණේ 2004 වසරේදී වන අතර, ඔහුගේ මළ සිරුර සීනිමෝදර පිහිටි නිවසෙන් සොයාගනු ලැබීය.
මෙම නඩුවේ විත්තිකරු වූයේ මියගිය පුද්ගලයාගේ හිටපු සේවකයකු සහ ඔහුගේ ගෙවතු වගා කටයුතු කරමින් සිටි කළවිලාගේ පතිරගේ පියල් වික්රමරත්න නැමැත්තාය. නීතිපතිවරයා විසින් ඔහුට එරෙහිව මෙම නඩුව පවරා තිබුණේ, වක්ර සාක්ෂි මත පමණක් පදනම් වෙමිනි.
නඩු විභාගය අතරතුරදී හෙළි වූයේ මෙම විත්තිකරු සිද්ධියට වසරකට පමණ පෙර රැකියාවෙන් ඉවත්ව ගොස් ඇති බවය. එසේම, මියගිය පුද්ගලයා සහ විත්තිකරු අතර යම් ගැටුමක් හෝ අමනාපයක් තිබූ බවට කිසිදු සාක්ෂියක් ඉදිරිපත් නොවීය.
මහාධිකරණය විසින් මෙහිදී අවධාරණය කළ තවත් කරුණක් වූයේ, මියගිය පුද්ගලයාගේ නිවස තාප්පයකින් සහ විදුලි වැටකින් යුක්ත, ඉහළ ආරක්ෂාවක් සහිත ස්ථානයක් බවය. ඊට අමතරව, සාක්ෂිකරුවන් විසින් සැකකරු නිල වශයෙන් හඳුනාගැනීමට පෙර, විමර්ශන නිලධාරීන් විසින් ඔහුව සාක්ෂිකරුවන්ට පෙන්වා ඇති බව හෙළිවීම නිසා,
පොලීසිය විසින් සිදුකළ හඳුනාගැනීමේ පෙරෙට්ටුවද ප්රශ්නගත විය. මේ හේතුවෙන්, එම සාක්ෂිවල විශ්වාසනීයත්වය පිළිබඳව අධිකරණය ප්රශ්න කළේය.
ඝාතනයට පැහැදිලි හේතුවක් නොමැතිවීම සහ ඉදිරිපත් කළ වක්ර සාක්ෂි ප්රමාණවත් නොවීම හේතුවෙන්, මෙම නඩුව සාධාරණ සැකයකින් තොරව ඔප්පු කිරීමට පැමිණිල්ල අසමත්වී ඇති බව අධිකරණය නිගමනය කළේය. පැමිණිල්ල විසින් ඉදිරිපත් කරන ලද සාක්ෂි මත පමණක් කිසිවකුට චෝදනා එල්ල කළ නොහැකි බවද මහාධිකරණ විනිසුරුවරයා අවධාරණය කළේය.
විත්තිකරු වෙනුවෙන් ජ්යෙෂ්ඨ නීතිඥ දර්ශන කුරුප්පු මහතා සහ නීතිඥ ප්රදීප් රාජපක්ෂ මහතා පෙනී සිටියේය.
Source – Gossip Lanka News
