මාරවිල සමූහ මිහිර විජේසේකර
එවකට රුපියල් ලක්ෂ 75කට වැඩි මුදලක් වැය කරමින් හලාවත ප්රාදේශීය සභාව විසින් ඉදිකරන ලද මාදම්පේ හරිත උයන සහ පරිසර සම්පත් කේන්ද්රය කිසිදු ප්රයෝජනයක් නොගෙන වල් බිහිවෙමින් විනාශ වී යාමේ තර්ජනයට ලක්ව පවතියි.
හලාවත – කොළඹ ප්රධාන මාර්ගයට මායිම්ව කඩුපිටිඔයට ආසන්නයෙන් මෙම හරිත උයන සහ ළමා උද්යානය ඉදිකර ඇත.
මෙහි ඉදිකර ඇති පරිසර සම්පත් කේන්ද්රය තුළින්ද ප්රදේශයේ පාසල් ළමුන්ට මෙන්ම දෙස් – විදෙස් සංචාරකයන්ට, පරිසරය පිළිබඳව ගවේෂණය කරන්නන්ට ඒ සඳහා දැනුම සහ තොරතුරු ලබා ගැනීමේ අවස්ථාව උදාවිය. කුඩා දරුවන්ට ක්රීඩා කටයුතු හුරු කිරීම සඳහා ළමා උද්යානයක් ද මෙහි ඉදිකර ඇත.
2005 අගෝස්තු මස 03 වැනිදා ඉදිකිරීම් ආරම්භ කර ඇති මෙම හරිත උයන සහ ළමා උද්යානය 2008 අගෝස්තු මස 30 වැනිදා ජනතා අයිතියට පත් කර ඇත.
ළමා උද්යානය සඳහා ප්රාදේශීය සභාව විසින් පළාත් නිශ්චිත ප්රතිපාදනවලින් රුපියල් ලක්ෂ 05 ක මුදලක් ද, සම්පත් කේන්ද්රය සඳහා පරිසර අමාත්යාංශය විසින් රුපියල් ලක්ෂ 45ක් ද වැය කර ඇති බව ඒ සම්බන්ධයෙන් කරන ලද සොයා බැලීමේදී අනාවරණය විය.
මේ වන විට වසර ගණනාවක් තිස්සේ මෙම ස්ථානය විනාශ වෙමින් පවතියි.
මෙම ස්ථානයේ ඇති ළමා උද්යානය තුළ කුඩා දරුවන්ට ක්රීඩා කළ හැකි උපකරණ රැසක් ස්ථාපනය කර ඇත. එමෙන්ම එම ස්ථානයට පැමිණෙන අයගේ පහසුව සඳහා වැසිකිළි සහ ජලපහසුකම් ද සම්පාදනය කර ඇත. පැමිණෙන අයගේ පහසුව සඳහා උද්යානය තුළ ඇති ගොඩනැඟිල්ලේ බිම් මහල තුළ ආපණ ශාලාවක් ද පවත්වාගෙන ගොස් ඇත. එම ගොඩනැඟිල්ලේ ඉහළ මහල භාවිත කර ඇත්තේ පරිසර සම්පත් කේන්ද්රය පවත්වාගෙනයාම සඳහාය. ඒ සඳහා අවශ්ය සියලුම පහසුකම් එම ස්ථානය සතුව පවතියි.
මෙම ස්ථානය වැසි කාලයේදී ජලයෙන් යටවී යන්නේය. ඒ මෙම භූමියට ආසන්නයෙන් ගලා යන කඩුපිටි ඔය පිටාර ගැලීම නිසාය. කඩුපිටිඔයේ ජීවත් වන බව කියන කිඹුලන් ද මෙම භූමිය තුළ නිතර සැරිසරන බවක් ප්රදේශවාසීන් නිරීක්ෂණය කර ඇත. මෙම ළමා උද්යානය සහ පරිසර කේන්ද්රය ස්ථාපනය කරන්නට පෙර එම අවදානම් තත්ත්වය සම්බන්ධයෙන් වගකිවයුත්තන් අවධානය යොමු නොකළේ මන්ද යන්න සොයා බැලිය යුතු වන්නේය.
ඒ සමඟම බලධාරීන් සිදු කර ඇත්තේ හරිත උයන සහ සම්පත් කේන්ද්රය වසා දැමීමය. එපමණක් නොව එම ස්ථනයේ තිබූ නාම පුවරුව පවා ගලවා ඉවත් කරන්නට ඔවුන් කටයුතු කර ඇත.
පවතින තත්ත්වයට කිසියම් පිළියමක් යොදා මෙම පරිසර සම්පත් කේන්ද්රය ස්ථාපනය කිරීම තුළින් දෙස්විදෙස් සංචාරකයින්ට අවශ්ය දැනුම ලබා දීමට හැකියාව ඇත. ඒ තුළින් අමතර ආදායමක් ද ලබා ගැනීමේ හැකියාව ඇත. එමෙන්ම ළමා උද්යානයේ පවත්වාගෙනයාම තුළින් ප්රදේශයේ දරු දැරියන්ට සවස් කාලය ගෙවීමට සුදුසු වටපිටාවක් සකස් වනු ඇත.
නමුත් බලධාරීන් ඒ කිසිවක් සිදු නොකර ළමා උද්යානය සහ පරිසර සම්පත් කේන්ද්රය වසා දමා ඇත්තේ රුපියල් ලක්ෂ ගණනක මුදලක් විනාශයට පත් කරමිනි
Source – Dinamina
