ඇමරිකානු ජනාධිපති ඩොනල්ඩ් ට්රම්ප්ගේ නියෝග මත ක්රියාත්මක වූ විශේෂ හමුදා මෙහෙයුමකින් වෙනිසියුලානු ජනාධිපති නිකලස් මදුරෝ සහ ඔහුගේ බිරිඳ වන සිලියා ෆ්ලෝරස් අත්අඩංගුවට ගෙන තිබේ. රාත්රියේ සහ අලුයම ක්රියාත්මක වූ මෙම මෙහෙයුමෙන් පසු ඔවුන් දෙදෙනා ඇමරිකාවේ නිව්යෝර්ක් නගරය වෙත රැගෙන ගොස් ඇති අතර, මත්ද්රව්ය ජාවාරම්, ත්රස්තවාදයට අනුබල දීම සහ දූෂණ ක්රියා සම්බන්ධයෙන් ඔවුන්ට එරෙහිව එහිදී අධිචෝදනා ගොනු කිරීමට නියමිත බව වාර්තා වේ. වෙනිසියුලාව හරහා ඇමරිකාවට විශාල වශයෙන් මත්ද්රව්ය ප්රවාහනය වන බවත් මදුරෝ ඊට වගකිව යුතු බවත් ඇමරිකානු බලධාරීන් ප්රකාශ කර ඇත.
මෙම අත්අඩංගුවට ගැනීමත් සමඟ වෙනිසියුලාවේ පාලනය තාවකාලිකව ඇමරිකා එක්සත් ජනපදය යටතට පත්ව ඇති බව ජනාධිපති ට්රම්ප් නිල වශයෙන් නිවේදනය කළේය. රට තුළ ආරක්ෂිත සහ සාමකාමී බල හුවමාරුවක් සිදුවන තෙක් පාලනය සිය භාරයේ පවතින බව ඔහු අවධාරණය කළ අතර, මෙය වෙනිසියුලානු ජනතාවගේ ආරක්ෂාව සහ යහපත උදෙසා ගත් පියවරක් බව පෙන්වා දුන්නේය. එසේම, වෙනිසියුලාවේ අනෙකුත් දේශපාලන හා හමුදා නායකයින්ටද මදුරෝට අත්වූ ඉරණම අත්විය හැකි බවට අනතුරු ඇඟවූ ඔහු, නීතියට ගරු කරන ලෙස ඔවුන්ගෙන් ඉල්ලා සිටියේය.
වෙනිසියුලාව සතු යටිතල පහසුකම් සහ ඛනිජ තෙල් සම්පත සම්බන්ධයෙන්ද ඇමරිකාව දැඩි අවධානයක් යොමු කර ඇත. වෙනිසියුලාවේ තෙල් කර්මාන්තයට ඇමරිකානු සමාගම් හරහා ප්රබල ලෙස මැදිහත් වන බවත්, “සොරාගත් තෙල්” නැවත ලබා ගන්නා බවත් ට්රම්ප් ප්රකාශ කර තිබේ. ලොව විශාලතම තෙල් සංචිත හිමි වෙනිසියුලාවේ බිඳ වැටී ඇති ආර්ථිකය සහ තෙල් ව්යාපාරය යළි ගොඩනැංවීමට කටයුතු කරන බව ඔහු සඳහන් කළේය. මෙම හමුදා මැදිහත්වීම ජාත්යන්තර දේශපාලනය තුළ දැඩි කතාබහක් ඇති කර තිබේ.
