ආපදාවෙන් විනාශ වූ ගම් සහ නගර ගොඩනැඟෙද්දී සිය අමාත්යාංශය බිඳුණු සිත් නැවත ගොඩනඟන මෙහෙයුම ආරම්භ කරන බව කාන්තා සහ ළමා කටයුතු ඇමැතිනි සරෝජා සාවිත්රි පෝල්රාජ් මහත්මිය පැවසුවාය. ආපදාවෙන් නිවාස, දේපළ සහ ඥාති හිත මිතුරන් අහිමිවූවන් ගැඹුරු මානසික ආතතීන්ට පත්ව සිටිති. ඔවුන් සුවපත් කිරීමට කාන්තා සහ ළමා කටයුතු අමාත්යාංශය සහ අනෙකුත් අමාත්යාංශ ඒකාබද්ධව පසු ආපදා මනෝ උපදේශනය සේවයක් ආරම්භ කර ඇත.
ඒ සඳහා පුහුණුකරුවන් පුහුණු කිරීමේ (ToT) වැඩසටහන ආරම්භ කිරීම බත්තරමුල්ල සුහුරුපාය පරිශ්රයේදී ඊයේ (22දා) පැවැති අවස්ථාවේදී ඊට සහභාගි වෙමින් ඇමැතිනිය මේ බව පැවසුවාය.
සියලු උපදේශන නිලධාරින් ආපදාව සිදු වූ මොහොතේම උපදේශන සේවයට තනි තනිව මැදිහත් වූ බවත් අදින් පසු එය නිසි ක්රමවේදයකට අනුව සිදු කිරීමට ශක්යතාව ලැබෙන බවත් නියෝජ්ය ඇමැති වෛද්ය නාමල් සුදර්ශන මහතා පැවැසීය.
කාන්තා සහ ළමා කටයුතු අමාත්යාංශය විසින් අධ්යාපන, උසස් අධ්යාපන සහ වෘත්තීය අධ්යාපන අමාත්යාංශය ග්රාමීය සංවර්ධන, සමාජ ආරක්ෂණ සහ ප්රජා සවිබල ගැන්වීමේ අමාත්යාංශය ඒකාබද්ධව, අනුබද්ධිත උපදේශන නිලධාරීන් පසු ආපදා උපදේශනය සඳහා විශේෂයෙන් පුහුණු කිරීම මේ වැඩමුළුව හරහා සිදු කෙරේ. දිනක් පුරාවට පැවති මේ වැඩසටහනින් පවුල් පාදක උපදේශනය, ළමයින් සඳහා විශේෂ මනෝ සමාජයීය උපදේශනය ඇතුළු ක්ෂේත්ර රාශියක් පිළිබඳ අවධානය යොමුකර තිබිණි.
ජ්යෙෂ්ඨ මනෝවිද්යා උපදේශක මහනුවර වෛද්ය චමින්ද වීරසිරිවර්ධන, වෛද්ය දර්ශනී හෙට්ටිආරච්චි, වෛද්ය චතුර අබේසූරිය මහත්ම මහත්මීන් ඇතුළු විශේෂඥ මණ්ඩලයක් මේ අවස්ථාවට සම්පත් දායකත්වය සැපයීය.
ඉරෝෂා දීපානි
Source – Dinmania
