මේ අවුරුද්ද පටන් ගත්තු දවසේ ඉඳලා කිව්වේ ඔය අලි, ඇත්තු ටික ඉන්ඩ දීපල්ලා. යුද්ධයෙන් ඉවර උනාට පස්සේ රටේ හදපු ජාතික භෞතික සැලැස්ම අනුව යටිතල පහසුකම් තියෙන ප්‍රදේශවල මිනිස්සුන්ට ඕනෑතරම් ඉන්ඩ, වගාකරන්න ඉඩම් දීපල්ලා කියලා…
නෑ… දේශපාලන හෙංචයියන්ගේ බලපෙරේතකමට හොයන් ගියේම අලි, ඇත්තු ඉන්න රූස්ස වනාන්තරවලටමයි. කී දෙනෙක් නම් අලි, ඇත්තු මරලා දැම්මද..? ජූලි 22 සිට අගෝස්තු 12 දක්වා දින 20ක කාලයේදී අලි 30 ක් මිය ගිහින්. අලි 30 දෙනාගෙන් පස් දෙනකුම මිය ගොස් ඇත්තේ වෙඩි වැදීම් නිසා. 2025 ජනවාරි සිට අගෝස්තු 12 දක්වා කාලයේදී අලින් 268 දෙනකු මියගොස් ඇත. ඒ අනුව ඉකුත් ජනවාරි මාසයේදී පමණක් අලි මරණ 47ක් වාර්තා විය. 2024 වසරේ අලි මරණ 388ක් වාර්තා වී ඇත. මෙච්චර දෙයක් වෙද්දිත් රජයේ එවුන්ම යනවා යාල හා කුමන ජාතික වනෝද්‍යානයන්ගේ ප්‍රේරණ කලාපයේ ඇති කැබිලිත්ත රජයේ රක්ෂිතයේ ඉඩම් ගොවියන් අතර බෙදාදීමට ඇති හැකියාව ගැන හොයලා බලන්න.
අනිත් පැත්තෙන් අලි එලවන්න ගත්තා. පුත්තලම,අනුරාධපුරය,මහවිලච්චිය,මහඉලුප්පල්ලම,අම්පාර,මාතලේ හා හම්බන්තොට මහ පරිමාණ අසාර්ථක අලි මෙහෙයුම් කළා. අලි අම්මලා ගබ්සා වෙන ආකාරයට,අලි පැටවු අතරමං වෙන ආකාරයට, පුංචි අලි පැටවුන්ට මරණ බිය ඇති වෙන ආකාරයට සහ ඔවුන්ව කන් බිහිරි වෙලා, ඇස් අන්ධ වෙලා සදාකල් අබ්බගාත වෙන ආකාරයට අලි පන්නපු එක කලේම ස්වභාව ධර්මය පවා කම්පාවෙන විදිහටයි වැඩ කටයුතු සිද්ධ කරේ.
අපි කියන්නේ මේකයි..දැන්වත් ඔය ස්වභාව ධර්මය පවා කම්පා කරවන කාළ. කණ්නි වැඩ නවත්තපියව්. ඒ සත්තුන්ට ඔවුන්ගේ නිජ භූමිවල ඉන්ඩ දීපියව් කියලා විතරමයි.. රටේ සංචාරකයන්ගෙන් ඩොලර් වැසි වස්සන මේ අහිංසක සත්තු ටික ආරක්ෂා වෙන විදිහේ වැඩපිළිවෙලක් වහා සකස් කරන්න කියලා විතරමයි.. අපි එහෙම කලොත් ස්වභාව ධර්මයා වුනත් මහා වැසි, කුණාටු, සුළි සුළන් වලින් විතරක් නෙමෙයි, සුනාමි වලින් පවා අපිව ආරක්ෂා කරයි..ඒක සහතිකයි.
මිහිඳු ෆොන්සේකා
