මාවිල්ආරු සොරොව්ව ආශ්‍රිතව පවතින අවදානම් තත්ත්වය හේතුවෙන් සේරුවිල අවට ගම්මාන රැසක ජනතාවගේ ජීවිත ආරක්ෂාව වෙනුවෙන් කඩිනම් ක්‍රියාමාර්ගයක් ගන්නා ලෙස සේරුවිල මංගල රාජ මහා විහාරාධිපති පූජ්‍යපාද අලුදෙණියේ සුබෝධි ස්වාමීන් වහන්සේ බලධාරීන්ගෙන් ඉල්ලා සිටිනවා.
උන්වහන්සේ දැනට එම ප්‍රදේශයේම රැඳී සිටින අතර, අවදානමට ලක්ව ඇති ගම්මාන ගණනාවක ජනතාව දැනට නිදාගෙන සිටින බවත්, පාන්දර 3 පමණ වන විට වඩාත් අවදානම් තත්ත්වයක් ඇතිවිය හැකි බවට තොරතුරු ලැබී ඇති බවයි පවසන්නේ.
උන්වහන්සේ ඉල්ලා සිටින්නේ, අවදානමට ලක්ව සිටින මිනිසුන් වහාම තම ගම්මානවලින් ඉවත් කර ගැනීමට කටයුතු කරන ලෙසත්, සේරුවිල පන්සල පිහිටා ඇත්තේ ඉතා උස් ස්ථානයක බැවින් එය ආරක්ෂිත වන අතර, එම ජනතාව පන්සල කරා යොමුකරන ලෙසත් උන්වහන්සේ ඉල්ලා සිටිනවා.
එමෙන්ම, සොරොව්වට කුමක් සිදු වුවද, පන්සලට කිසිදු හානියක් සිදු නොවන බවයි උන්වහන්සේ වැඩිදුරටත් අවධාරණය කර සිටින්නේ.
සොරොව්වට කිසිවක් සිදු නොවීමටද ඉඩ ඇති නමුත්, මිනිස් ජීවිත සුරක්ෂිත කර ගැනීම සඳහා හැකි ඉක්මනින් මෙම ජනතාව පන්සලට ගෙන ඒමට සියලු දෙනාගේම සහයෝගය අපේක්ෂා කරන බව උන්වහන්සේ සඳහන් කර සිටිනවා.
