බෙල්ජියම් ජාතික 76 හැවිරිදි පුද්ගලයෙකු, තමන් විවාහ කරගැනීමට නියමිතව සිටි බවට විශ්වාස කළ ප්රංශ රූ රැජිනක් හමුවීම සඳහා කිලෝමීටර් 760ක දුරක් ගෙවා පැමිණ තිබේ. නමුත්, තමන් දරුණු ප්රේම වංචාවක ගොදුරක් වී ඇති බව ඔහුට අවබෝධ වූයේ ඇයගේ නිවසට පැමිණීමෙන් පසුවය. මිෂෙල් නැමැති මෙම පුද්ගලයා, 2007 වසරේ ප්රංශ රූ රැජින තරගයේ අනුශූරතාවය දිනූ සෝෆී වූසෙලෝඩ්ගේ නිවසට ගිය අවස්ථාවේදී, ඔහුව පිළිගනු ලැබුවේ ඇයගේ සැමියා විසිනි.
තමන් සති කිහිපයක් පුරා ප්රේම සම්බන්ධතාවක් පවත්වාගෙන ගිය බවත්, වංචනිකයන්ට ඒ වෙනුවෙන් යුරෝ 30,000ක් (ඇමරිකානු ඩොලර් 35,000ක්) ගෙවූ බවත් ඔහු, සෝෆීගේ සැමියා වන ෆේබියන් වෙත පවසා ඇත. තමන් කළ මෝඩකම ගැන පසුතැවුණු මිෂෙල්, “මම මෝඩයෙක්” යැයි එම යුවළට පැවසූ බව සඳහන් වේ. මිෂෙල් මුහුණදුන් මෙම අවාසනාවන්ත සිදුවීම ප්රසිද්ධියට පත් වූයේ, එම හමුවීම සම්බන්ධ වීඩියෝවක් ෆේබියන් විසින් අන්තර්ජාලයට මුදා හැරීමෙන් පසුවය.
වසර හතරකට පෙර බිරිඳ මියගිය වැන්දඹුවෙකු වන මෙම බෙල්ජියම් ජාතිකයා, සති ගණනාවක් තිස්සේ වට්ස්ඇප් (WhatsApp) ඔස්සේ සන්නිවේදනය කර ඇත්තේ හිටපු ‘මිස් ලිමොසින්’ කිරුළ හිමි කරගත් සැබෑ සෝෆී වූසෙලෝඩ් සමග යැයි සිතාගෙනය. පැරිස් නුවර සිට කිලෝමීටර් 420ක් පමණ දකුණින් පිහිටි ශාන්ත-ජුලියන් හි පිහිටි ඔවුන්ගේ නිවස වෙත ඔහු ජූලි 9 වන දින පැමිණ තිබේ. “මම සෝෆී වූසෙලෝඩ්ගේ අනාගත සැමියා” යැයි ඔහු පැවසූ බවත්, ඊට පිළිතුරු ලෙස “හොඳයි, මම තමයි එයාගේ වත්මන් සැමියා” යැයි තමන් පැවසූ බවත් ෆේබියන් සඳහන් කරයි.
අනතුරුව, 38 හැවිරිදි සෝෆී ඔහුට සිදුවී ඇති වංචාව පැහැදිලි කිරීමට උත්සාහ කර ඇති අතර, පොලීසියට පැමිණිල්ලක් ගොනු කරන ලෙස එම යුවළ ඔහුගෙන් ඉල්ලා තිබේ. කෙසේ වෙතත්, ඔහු එසේ කළේද යන්න පැහැදිලි නැත. ප්රේම සම්බන්ධයක් ඇති බවට ඒත්තු ගන්වමින් යම් අපරාධකරුවෙකු විසින් මුදල් ලබාගැනීම සඳහා පුද්ගලයෙකු රැවටීමට ලක් කිරීම ‘ප්රේම වංචාවක්’ ලෙස හැඳින්වේ.
