ඉරානයේ උත්තරීතර නායකයා වූ අයතුල්ලා අලි කමේනිගේ අභාවයෙන් පසු එරට දේශපාලන වාතාවරණය තවදුරටත් උණුසුම් වී තිබේ. වාර්තා අනුව, ජනාධිපතිවරයා ලෙස කටයුතු කරන මධ්යස්ථ මතධාරී මෙසූඩ් පෙසෙෂ්කියන් නීතිපති සහ නීතිවේදීන් කිහිප දෙනෙකු සමඟ එක්ව අන්තර්වාර රජයක් පිහිටුවීම පිළිබඳ සලකා බලමින් සිටින බව විදෙස් මාධ්ය සඳහන් කරයි.
ඉරාන පාලන ව්යුහය තුළ බලවත්ම තනතුර වන්නේ උත්තරීතර නායකයා වන අතර, ජනාධිපතිවරයා එයට පහළින් පිහිටා ඇත. ඒ නිසා කමේනිගේ අභාවය, එරට බල තරගයට සෘජු බලපෑමක් ඇති කළ හැකි සිදුවීමක් ලෙස සැලකේ.
කමේනිට පසු නව උත්තරීතර නායකයෙකු තෝරා ගැනීමේ වගකීම තිබෙන්නේ ඉස්ලාමීය පාලක මණ්ඩලයටය. පූජකවරුන් 88 දෙනෙකුගෙන් සමන්විත මෙම මණ්ඩලය, ජනතා ඡන්දයෙන් තේරී පත්වුවද, තරඟ කළ හැක්කේ ඉස්ලාමීය ජනරජයට පක්ෂපාතී පුද්ගලයන්ට පමණි. එබැවින් එහි බහුතරය දැඩි මතධාරීන් බව විශ්ලේෂකයින් පවසයි.
මේ අතර, නව උත්තරීතර නායකයෙකු ඉක්මනින් තෝරා ගැනීම අවශ්ය වුවද, වත්මන් ආරක්ෂක තත්ත්වය එයට බාධාවක් වී ඇතැයි වාර්තා වේ. විශේෂයෙන්ම ඇමෙරිකා එක්සත් ජනපදය සහ ඊශ්රායලය විසින් එල්ල වන හමුදා තර්ජන හේතුවෙන් මණ්ඩලය ආරක්ෂිතව රැස්වීම පවා අභියෝගයකට ලක්ව ඇති බව සඳහන් වේ.
මෙම තත්ත්වය හමුවේ, ඉරානය තුළ අනාගත බල සැලසුම් කෙසේ හැඩ ගන්නාද යන්න පිළිබඳව ලෝක අවධානය යොමු වී තිබේ.
