ශ්රී ලංකාවේ දකුණු වෙරළට ඔබ්බෙන් වූ ඉරාන නෞකාවකට එල්ල වූ බවට සැක කෙරෙන සබ්මැරීන් ප්රහාරයකින් අවම වශයෙන් පුද්ගලයින් 101 දෙනෙකු අතුරුදහන් වී තවත් 78 දෙනෙකු තුවාල ලබා ඇති බව ශ්රී ලංකා නාවික හමුදාවේ සහ ආරක්ෂක අමාත්යාංශයේ ආරංචි මාර්ග උපුටා දක්වමින් රොයිටර් පුවත් සේවය වාර්තා කළේය.
ගාල්ල වෙරළට නාවික සැතපුම් 40ක් පමණ දුරින් දුෂ්කරතා වාර්තා කළ ඉරාන නාවික හමුදාවට අයත් ‘IRIS Dena’ නෞකාවෙන් ආපදා ඇමතුමක් ලැබීමෙන් පසු ශ්රී ලංකා නාවික හමුදාවේ යාත්රා පිටත් කර හරින ලදී.
තුවාල ලැබූ ඉරාන නාවික හමුදා නිලධාරීන් කිහිප දෙනෙකු බේරාගෙන ගොඩබිමට ගෙන ආ බව බලධාරීන් මීට පෙර තහවුරු කළ අතර, 32 දෙනෙකු ප්රතිකාර සඳහා කරාපිටිය ශික්ෂණ රෝහලට ඇතුළත් කර තිබුණි.
බේරාගත් එක් අයෙකුගේ තත්ත්වය බරපතල බවත් තවත් කිහිප දෙනෙකුට මධ්යස්ථ හා සුළු තුවාල සිදුවී ඇති බවත් රෝහල් නිලධාරීහු පැවසූහ.
මේ අතර, ශ්රී ලංකා නාවික හමුදා යාත්රා තවමත් ගලවා ගැනීමේ මෙහෙයුම්වල නියැලී සිටින අතර, තවමත් මුහුදේ සිටින අය සොයා ගැනීමට සහ ඔවුන්ට සහාය වීමට උත්සාහයන් දිගටම කරගෙන යයි.
කෙසේ වෙතත්, සබ්මැරීන් ප්රහාරයක් හෝ අතුරුදහන් වූ සංඛ්යාව පිළිබඳ වාර්තා සනාථ කරමින් ශ්රී ලංකා බලධාරීන් තවමත් නිල ප්රකාශයක් නිකුත් කර නොමැත. රොයිටර් පුවත් සේවය පැවසුවේ මෙම තොරතුරු ශ්රී ලංකා නාවික හමුදාවේ සහ ආරක්ෂක අමාත්යාංශයේ මූලාශ්ර මත පදනම් වූ බවයි.
