වේල්ස් රෝස කුසුම ලෙස ලෝකයම ආදරයෙන් හැඳින්වූ ඩයනා කුමරිය අදටත් අමතක නොවන නාමයක්. 1997 අගෝස්තු 31 වැනිදා, ප්රංශයේ පැරිස් නගරයේ සිදු වූ රිය අනතුරකින් ඇය අකල් වියෝවට පත් වීම 90 දශකයේ ලෝකයම කම්පනයට පත් කළ සංවේදී පුවතක් බවට පත්වුණා.
ඇයගේ අවසන් ගමන පිළිබඳව අදටත් ලෝකය පුරා විශාල උනන්දුවක් පවතිනවා. අවසන් විවේකයට සැරසූ අවස්ථාවේ, ඩයනා කුමරිය ඇඳගෙන සිටියේ ඇයගේ සමීප මිතුරිය වූ Catherine Walker විසින් නිර්මාණය කළ කළු පැහැති, දිගු අත් සහිත අලංකාර ඇඳුමකි. අනතුරෙන් ඇති වූ තුවාල ආවරණය වන ලෙස එය තෝරාගෙන තිබූ බව සඳහන් වේ.
ඇයගේ දෑතට, Mother Teresa විසින් තෑගි කළ රෝසරි මාලයක් ද පළඳවා තිබූ අතර, ඇයගේ සුරතල් පුතුන් දෙදෙනාගේ සහ දෙමාපියන්ගේ ඡායාරූප ද ඇය සමඟ තැන්පත් කළ බවට තොරතුරු පැතිර ගියේය.
නිල වශයෙන් ප්රකාශ කර ඇති පරිදි, Diana, Princess of Walesගේ දේහය තැන්පත් කර ඇත්තේ ඇය හැදී වැඩුණු ස්පෙන්සර් පවුලට අයත් Althorp වත්තේ, කුඩා දූපතක් මත පිහිටි සොහොන් ස්ථානයකය. එය පෞද්ගලික ස්ථානයක් වන අතර, සාමාන්ය ජනතාවට සෘජුව පිවිසීමට අවසර නොමැත.
එහෙත්, වසර කිහිපයකට පෙර ඩයනාගේ සමීප හිතවතෙකු ලෙස හඳුන්වන Roberto Devorik විසින් වෙනස්ම ප්රකාශයක් කළා. ඔහු කියා සිටියේ, ඩයනා කුමරිය සැබවින්ම අල්තෝර්ප් හි නොව, Great Brington ගම්මානයේ පිහිටි වසර 1200ක් පමණ පැරණි සැක්සන් දේවස්ථානයේ — ඇයගේ පියා අසල ඇති පවුලේ සොහොන් ගැබ තුළ — රහසිගතව තැන්පත් කර ඇති බවයි.
කෙසේ වෙතත්, මෙම ප්රකාශය පිළිබඳව ස්පෙන්සර් පවුල හෝ රාජකීය පාර්ශවය මෙතෙක් නිල වශයෙන් කිසිදු තහවුරු කිරීමක් සිදු කර නැහැ. ඒ නිසාම, ඇයගේ අවසාන නිදන ස්ථානය ගැන ඇති මේ කතාව අදටත් රහසක් ලෙසම පවතිනවා.
වසර ගණනාවක් ගතවුවත්, ලෝකයම ආදරය කළ ඩයනා කුමරියගේ මතකය හා ඇය වටා ගොඩනැගුණු කතා අදටත් ජන හදවත තුළ ජීවමානයි.
