වසර ගණනාවක් පරිශීලකයින් අතර ජනප්රියව පැවති ස්වාධීන Messenger වෙබ් අඩවිය (messenger.com) 2026 අප්රේල් මාසයෙන් පසු අත්හිටුවීමට Meta සමාගම තීරණය කර තිබේ. විදෙස් මාධ්ය වාර්තා පවසන්නේ, මෙම පියවර මඟින් Meta සමාගම සිය පණිවිඩ හුවමාරු සේවාව නැවතත් ප්රධාන Facebook වේදිකාව හා ඒකාබද්ධ කිරීමට උත්සාහ කරන බවයි.
මෙම තීරණය අනුව, 2026 අප්රේල් සිට messenger.com වෙත පිවිසෙන පරිශීලකයින් ස්වයංක්රීයව [facebook.com/messages](https://www.facebook.com/messages) වෙත යොමු කෙරේ. එමඟින්, සක්රීය Facebook ගිණුමක් නොමැතිව Messenger පමණක් භාවිතා කරන පරිශීලකයින්ට පරිගණකය හරහා පණිවිඩ බැලීමේ හැකියාව අහිමි වේ. ඔවුන්ට පණිවිඩ භාරගැනීම සඳහා එක් විකල්පය වන්නේ Messenger ජංගම යෙදුම පමණි.
සියලුම චැට් ඉතිහාසය ආරක්ෂිතව පවතින අතර, පරිශීලකයින් විසින් සකසන ලද PIN අංකය භාවිතා කර ඕනෑම වේලාවක ඒවා නැවත ලබාගත හැකි බව සඳහන් වේ.
මෙම තීරණය සම්බන්ධයෙන් බොහෝ පරිශීලකයින් නොසතුට පළ කර ඇති අතර, විශේෂයෙන් Facebook ගිණුම් අක්රිය කර Messenger පමණක් භාවිතා කළ පිරිසට මෙය විශාල බාධාවක් ලෙස හැඳින්වේ. එසේම, ප්රධාන Facebook වෙබ් අඩවියේ ඇති අනවශ්ය පුවත් මඟහැර, පණිවිඩ හුවමාරු කිරීමට කැමති පරිශීලකයින්ටද මෙය අවාසිදායක වේ.
2008 දී “Facebook Chat” ලෙස ඇරඹි මෙම සේවාව 2011 දී ස්වාධීන යෙදුමක් ලෙස වෙන් කරන ලදී. නමුත් 2023 වසරේ සිට Meta සමාගම පණිවිඩ හුවමාරුව නැවත Facebook තුළට ගෙන ඒමට පියවර ගෙන තිබේ. මෙහි ප්රධාන අරමුණ වන්නේ නඩත්තු පිරිවැය අවම කරමින් සියලුම සේවාවන් එක් තැනකට ගොනු කිරීම බව වාර්තා වේ.
තවද, මේ සම්බන්ධයෙන් Meta ආයතනය නිල නිවේදනයක් නිකුත් කර නොමැති බවද වාර්තා වේ.(Ape Rata)
