ඉන්දීය ක්රිකට් පිටියේ “Big Hitter” ලෙස ජනප්රිය **Rinku Singh**ගේ ජීවිතයට අතිශය විශාල බලපෑමක් කළ ඔහුගේ පියා ඛාන්චන්ද් සිං අලුයම මෙලොවින් සමුගෙන තිබේ. වසර කිහිපයක් පුරා අක්මා පිළිකාවකින් පීඩා විඳිමින් සිටි ඔහු, අවසානයේ පවුලේ සාමාජිකයන් අතරම නිහඬව සමුගෙන ඇතැයි වාර්තා වේ.
විස්සයි විස්ස ලෝක කුසලානයට ඉන්දීය කණ්ඩායම නියෝජනය කරමින් සිටි රින්කු, පියාගේ තත්ත්වය බරපතළ බව දැනගත් වහාම මීට දින කිහිපයකට පෙර නැවත මව්බිමට පැමිණියේය. ග්රේටර් නොයිඩා හි රෝහලක ප්රතිකාර ලබමින් සිටි පියා අසල ඔහු රැඳී සිටියේ දැඩි සංවේගයෙන්.
මේ අතර ඊයේ පැවති සිම්බාබ්වේ තරගය සඳහා රින්කු කණ්ඩායම සමඟ සිටියද, පෞද්ගලික හේතු සහ පියාගේ අසනීප තත්ත්වය හේතුවෙන් ඔහු ක්රීඩා කරවීමට කළමනාකාරිත්වය තීරණය නොකළ අතර, ඒ වෙනුවට Sanju Samson කණ්ඩායමට ඇතුළත් කර තිබුණි.
රින්කු සිංගේ සාර්ථකත්වය පිටුපස තිබුණේ සරල නමුත් සංවේදී කතාවකි. ඔහුගේ පියා අලිගාර්හි LPG ගෑස් සිලින්ඩර බෙදාහරින්නෙකු ලෙස කටයුතු කළ සාමාන්ය කම්කරුවෙකි. අසරණ ආර්ථික තත්ත්වයක මැද වුවද, තම රැකියාව අත් නොහැර පුතාට ක්රිකට් සපුරා ගැනීමට අවශ්ය හැම අවස්ථාවක්ම ඔහු ලබා දුන්නේය.
රින්කු ලොව හඳුනාගත් තරුවක් වුවත්, ඔහුගේ පියා තම පැරණි ජීවිත රටාව අත්හැරියේ නැති බව සමීපයන් සඳහන් කරති. පුතාගේ සාර්ථකත්වය අතරමඟ තමන්ගේ මූලයන් අමතක නොකළ නිහතමානී පියෙකු ලෙස ඔහු සැමවිටම මතකයේ රැඳෙනු ඇත.
ගෑස් සිලින්ඩර කරේ තියාගෙන ජීවිතය ගෙනගිය ඒ සරල මිනිසා, අද පුතාගේ ජයග්රහණ අතර නිහඬවම සමුගෙන ඇත. නමුත් ඔහු වපුරා ගිය කැපවීමේ සහ පිය සෙනෙහසේ කතාව, රින්කුගේ සෑම ඝාතක පහරකම තුළම තවදුරටත් ජීවමාන වේ.
