ශ්රී ලාංකීය සංගීතයේ සුවඳ ගෙන ගිය සම්භාවනීය ගායකයෙකු වන වික්ටර් රත්නායක වෙත ගෞරව පුදකරමින් සංවිධානය කළ විශේෂ උපහාර උළෙලක් පසුගියදා කොළඹදී උත්කර්ෂවත් අන්දමින් පැවැත්විණි. මෙම අවස්ථාවේදී ඔහු ගැයූ “ආදරයේ උල්පත වූ අම්මා” ගීතය සමඟ උත්සව සභාවම සංවේදී වූ අතර, අග්රාමාත්ය ආචාර්ය හරිනි අමරසූරිය ද එම මොහොතේ දැක්වූ හැඟීම්බරත්වය විශේෂ අවධානයට ලක්විය.
දශක හයක සංගීත මෙහෙවරට ගෞරව
ශ්රී ලංකා ගුවන්විදුලි සංස්ථාව විසින් සංවිධානය කළ “සුභාවිත ගීතයේ සිටුවරයාණෝ ආචාර්ය වික්ටර් රත්නායක අභිනන්දනාභිෂේකය” නම් මෙම උපහාර උළෙල, ගුවන්විදුලි සංස්ථාවේ කුමාරතුංග මුනිදාස මැදිරියේදී පැවැත්විණි.
දශක හයකට අධික කාලයක් පුරා ශ්රී ලාංකීය සංගීතයට සිදුකළ අමිල මෙහෙවර ඇගයීම මෙහි ප්රධාන අරමුණ විය. එමෙන්ම, ගුවන්විදුලි සංස්ථා පරිශ්රයේ ඔහුගේ ඡායාරූපයක් විවෘත කිරීමද අග්රාමාත්යවරියගේ අතින් සිදු කෙරිණි.
“මම ඔබේ රසිකයෙක්…” – අගමැතිනිය
උත්සව සභාව අමතමින් අග්රාමාත්ය ආචාර්ය හරිනි අමරසූරිය පැවසුවේ,
“මම ආචාර්ය වික්ටර් රත්නායකයන්ගේ රසිකයෙක්. මේ මොහොත මට ඉතා විශේෂයි. ඔබතුමාට මේ තරම් සමීපව උපහාර පුද කරන්නට ලැබීම මගේ ජීවිතයේ සුවිශේෂී මොහොතක්.”
ඇය පෙන්වා දුන්නේ, වික්ටර් රත්නායකයන්ගේ ගීත තම ළමා කාලයම හැඩගස්වා ඇති බවයි. “ස” ඒකපුද්ගල ප්රසංගය තමන් නරඹූ පළමු වේදිකා ප්රසංගය බවත්, “කුරුල්ලන්ට ගී ගයන්න”, “සඟවා ගනු මැන සොඳුරිය” වැනි ගීත තමන්ට සිංහල භාෂාවේ රසය සහ සංගීතයේ ගැඹුරුත්වය හඳුනාගැනීමට උපකාරී වූ බවත් ඇය සඳහන් කළාය.
සංහිඳියාව ගෙන ආ ගීත
වික්ටර් රත්නායකයන්ගේ ගීත තුළ තිබෙන සංහිඳියාව, සංස්කෘතික විවිධත්වය හා ආදරයේ සරළත්වය පිළිබඳවද අග්රාමාත්යවරිය විශේෂයෙන් සඳහන් කළාය. “ඔබ යන ගමනේ මාවත අහුරා” වැනි ගීත සංගීතයෙන් පමණක් නොව, සමාජීය වටිනාකම් ද ජනතාවට ළඟා කළ නිර්මාණ බව ඇය පැවසුවාය.
84 වැනි ජන්ම දිනයට සුභ පැතුම්
පසුගිය පෙබරවාරි 18 වැනිදා සිය 84 වැනි ජන්ම දිනය සමරූ වික්ටර් රත්නායකයන් වෙත අග්රාමාත්යවරිය නිදුක් නිරෝගී චිර ජීවනය ප්රාර්ථනා කළාය.
මාධ්ය ක්ෂේත්රයේ දැඩි තරඟකාරිත්වය මධ්යයේ වුවද, ජීවමාන කලාකරුවන්ට මෙවන් ගෞරව දැක්වීම පිළිබඳව ශ්රී ලංකා ගුවන්විදුලි සංස්ථාව වෙතද ඇය ස්තුතිය පළ කළාය.
මෙම අවස්ථාවට බුද්ධශාසන, ආගමික හා සංස්කෘතික කටයුතු අමාත්ය ආචාර්ය හිනිදුම සුනිල් සෙනෙවි, ජනමාධ්ය නියෝජ්ය අමාත්ය කෞශල්යා ආරියරත්න, කවියෙකු හා ගීත රචකයෙකු වන ආචාර්ය රත්න ශ්රී විජේසිංහ, ගුවන්විදුලි සංස්ථා සභාපති මහචාර්ය උදිත ගයාශාන් ගුණසේකර ඇතුළු සම්භාවනීය අමුත්තන් රැසක් එක්ව සිටියහ.
සංගීතයෙන් පරපුරක් හැඩගස්වූ කලාකරුවෙකුට ජීවමානව ගෞරව දැක්වීම, රටක් ලෙස අපට හිමි වටිනා අවස්ථාවක් බව එම උත්සවය යළිත් සනාථ කළේය.(Ape Rata)
