ප්‍රමිතියෙන් තොර මානව ඉමියුනොග්ලොබියුලින් එන්නත් ආනයනය කිරීමේ චෝදනාව සම්බන්ධයෙන් නීතිපතිවරයා විසින් හිටපු අමාත්‍ය කෙහෙළිය රඹුක්වැල්ල සහ තවත් 11 දෙනෙකුට එරෙහිව අධිචෝදනා ගොනු කර ඇත.
අද කොළඹ මහාධිකරණ විශේෂ ත්‍රිපුද්ගල විනිසුරු මඩුල්ල හමුවේ අධිචෝදනා ගොනු කරන ලදී.
ප්‍රමිතියෙන් තොර මානව ඉමියුනොග්ලොබියුලින් එන්නත් ආනයනය කිරීමේ චෝදනාව මත හිටපු සෞඛ්‍ය අමාත්‍යවරයා 2024 පෙබරවාරි මස මුලදී අත්අඩංගුවට ගෙන රිමාන්ඩ් කරන ලදී.
මාස හතකට පසු මාලිගාකන්ද මහේස්ත්‍රාත් අධිකරණය විසින් ඔහුට ඇප ලබා දෙන ලදී.
සෞඛ්‍ය අමාත්‍යවරයා ලෙස කටයුතු කළ කාලය තුළ ප්‍රමිතියෙන් තොර එන්නත් මිලදී ගැනීමට අනුබල දුන් බවට කෙහෙළිය රඹුක්වැල්ලට චෝදනා එල්ල වී තිබේ.
එම ප්‍රමිතියෙන් තොර ඖෂධය ආනයනය කිරීම හරහා රුපියල් මිලියන 130 ක මූල්‍ය වංචාවක් සිදුවී ඇති බව රහස් පොලිස් පරීක්ෂණවලින් හෙළි වී තිබේ.
චෝදනා 43ක් යටතේ මෙම අධි චෝදනා ගොනුකර තිබේ.
