ඇමරිකාවේ මිචිගන් ප්‍රාන්තයේ, ග්‍රෑන්ඩ් බ්ලැන්ක් නගරයේ පිහිටි ‘ද චර්ච් ඔෆ් ජීසස් ක්‍රයිස්ට් ඔෆ් ලැටර්-ඩේ සේන්ට්ස්’ දේවස්ථානයට එල්ලවූ වෙඩි ප්‍රහාරයකින් සහ ගිනි තැබීමකින් පුද්ගලයන් සිව් දෙනෙකු ජීවිතක්ෂයට පත්ව තවත් අට දෙනෙකු තුවාල ලබා ඇත. ඉරාක යුද ප්‍රවීණයෙකු වන තෝමස් ජේකබ් සෑන්ෆර්ඩ් නැමැති 40 හැවිරිදි පුද්ගලයා මෙම ප්‍රහාරය සිදුකර තිබේ.
ඉරිදා දේව මෙහෙය සඳහා සියගණනක් බැතිමතුන් රැස්ව සිටි අවස්ථාවේදී, ප්‍රහාරකයා සිය වාහනය දේවස්ථානය තුළට ධාවනය කර, ප්‍රහාරක ගිනි අවියකින් වෙඩි තැබීම ආරම්භ කර තිබේ.
අනතුරුව, පෙට්‍රල් වැනි ද්‍රව්‍යක් භාවිතයෙන් ගොඩනැගිල්ලට ගිනි තබා ඇති බව විමර්ශකයෝ විශ්වාසය පල කරති. සිද්ධිය සැලවූ වහාම ක්‍රියාත්මක වූ පොලීසිය, ප්‍රහාරකයා සමග වෙඩි හුවමාරුවක නිරතවී ඔහුව එම ස්ථානයේදීම මරා දමන ලදී.
මෙම ප්‍රහාරයෙන් දේවස්ථාන ගොඩනැගිල්ලට දැඩි හානි සිදුව ඇති අතර, සිද්ධිය සම්බන්ධයෙන් ඇමරිකානු ෆෙඩරල් විමර්ශන කාර්යාංශය (FBI) විසින් පරීක්ෂණ මෙහෙයවනු ලබයි. ප්‍රහාරකයාගේ නිවස සහ දුරකථන වාර්තා පරීක්ෂාවට ලක් කරමින් ප්‍රහාරයට හේතුව සොයාගැනීමට බලධාරීන් උත්සහ දරණ නමුත්, මෙතෙක් නිශ්චිත හේතුවක් අනාවරණය වී නොමැත.
වෙඩි ප්‍රහාරයෙන් දෙදෙනෙකු මියගොස් ඇති අතර, ගින්නෙන් විනාශවූ දේවස්ථාන සුන්බුන් අතර තිබී තවත් මළසිරුරු දෙකක් සොයාගෙන තිබේ. හානියට පත් ගොඩනැගිල්ල තවදුරටත් පිරිසිදු කරමින් සිටින බැවින්, තවත් වින්දිතයින් සිටිය හැකි බවට බලධාරීහු සැක පළ කරති. මියගිය හෝ තුවාල ලැබූවන්ගේ අනන්‍යතාව මෙතෙක් බලධාරීන් විසින් නිල වශයෙන් හෙළිකර නොමැත.
මෙම කෘර ප්‍රහාරය, මිචිගන් ආණ්ඩුකාර ග්‍රෙචන් විට්මර් සහ ජනාධිපති ඩොනල්ඩ් ට්‍රම්ප් ඇතුළු ප්‍රාදේශීය සහ ජාතික නායකයින්ගේ දැඩි හෙළාදැකීමට ලක්වී තිබේ.
Source – Gossip Lanka News
