ඉරාන බොරතෙල් ජාවාරම් කිරීම සම්බන්ධයෙන් මීට පෙර සම්බාධක පනවා තිබූ තෙල් නෞකාවක් ඉන්දියන් සාගරයේදී සිය භාරයට ගත් බව ඇමරිකානු ආරක්ෂක මූලස්ථානය වන පෙන්ටගනය ප්රකාශ කළේය.
M/T ඉන්දීය සාගරයේදී අමෙරිකානු හමුදා භාරයට පත් වූ ‘ටිෆනි’ (Tifani) නමැති බොරතෙල් ප්රවාහන නෞකාව සිය ගමන් මගෙහි හදිසි වෙනසක් සිදු කර ඇති බව නෞකා ලුහුබැඳීමේ දත්ත අනාවරණය කරයි.
නාවික දත්ත පද්ධතිවලට අනුව, මේ වන විට මෙම නෞකාව ශ්රී ලංකාවට ගිනිකොණ දෙසින් කිලෝමීටර් 700 ක් (සැතපුම් 430 ක්) පමණ දුරින් පිහිටි මුහුදු කලාපයක සිය පිහිටීම සටහන් කර ඇත
පසුගිය අප්රේල් 10 වනදා පර්සියානු ගල්ෆ් කලාපයෙන් ගමන් ආරම්භ කළ ‘ටිෆනි’ නෞකාව අප්රේල් 18 වනදා ශ්රී ලංකාවේ ගාල්ල වරාය ආසන්නයේ කෙටි නැවතුමක නිරත වී ඇති අතර, ඉන් අනතුරුව අමෙරිකානු හමුදා විසින් එය සිය භාරයට ගෙන තිබුණි.
පෙන්ටගනය සඳහන් කරන පරිදි, මෙම මෙහෙයුම කිසිදු ගැටුමකින් තොරව සිදු කර ඇති අතර, එම අවස්ථාවේදී නෞකාව ඉරාන තෙල් ප්රවාහනය කරමින් තිබී ඇත. නෞකාව බොට්ස්වානා (Botswana) ධජය යටතේ ගමන් කළද, එය රාජ්යයක් නොමැති (stateless) නෞකාවක් ලෙස ඇමරිකාව හඳුන්වා දී ඇත.
ඉදිරි දින කිහිපය තුළ මෙම නෞකාව ඇමරිකාවට රැගෙන එන්නේද නැතහොත් වෙනත් රටකට භාර දෙන්නේද යන්න පිළිබඳව තීරණයක් ගැනීමට නියමිතය.
මෙම ක්රියාව ඉරානයට සම්බන්ධ හෝ ඉරානයට ද්රව්යමය ආධාර සපයන නෞකා ලොව පුරා ලුහුබැඳීමේ ඇමරිකානු උපාය මාර්ගයේ කොටසක් බව ආරක්ෂක අංශ පවසයි.
පෙන්ටගනය අවධාරණය කරන්නේ “ජාත්යන්තර මුහුදු තීරය සම්බාධක පනවා ඇති නෞකා සඳහා ආරක්ෂිත රැකවරණයක් නොවන” බවයි
ඇමරිකානු ඒකාබද්ධ මාණ්ඩලික ප්රධානීන්ගේ සභාපති ජෙනරාල් ඩෑන් කේන් ප්රකාශ කළේ ඉරානයට ආධාර සපයන ඕනෑම නෞකාවක් අත්අඩංගුවට ගැනීම සඳහා තම හමුදා සක්රීයව කටයුතු කරන බවයි.
මෙම සිදුවීම වාර්තා වන්නේ ඇමරිකාව සහ ඉරානය අතර පවතින නොසන්සුන්කාරී සටන් විරාමය අවසන් වීමට ආසන්න මොහොතකදීය.
මේ අතර, පකිස්ථානය මැදිහත් වී දෙරට අතර සාකච්ඡා නැවත ආරම්භ කිරීමට උත්සාහ කරමින් සිටින බවද වාර්තා වේ. ඉරාන හමුදා අණදෙන මූලස්ථානය මෙම නෞකාව අත්පත් කර ගැනීම මුහුදු මංකොල්ලකෑමක් සහ සටන් විරාමය උල්ලංඝනය කිරීමක් ලෙස හඳුන්වා දී ඇත
