අපවත් වී වදාළ රඹුකන සිද්ධාර්ථ හිමියන් පිළිබඳව සමාජ මාධ්ය තුළ බොහෝ දෙනා කතාබහ කරන මේ මොහොතේ, තවත් අපූරු භික්ෂූන් වහන්සේ නමකගේ මතකය යළිත් සමාජයට මතක් වෙමින් තිබෙනවා.
ඒ තමයි මාතර කවි කීර්ති ස්වාමින් වහන්සේ.
(කවි කීර්ති කියන්නේ කෙටි නම. හරි නම කරගස්ආරෙ විනය කිත්ති හිමි)
චාමර වීරසිංහගේ හඬින් අපේ හදවත් තුළ සදා රැඳුණු ගීත රැසකට පදවැල් සැපයූ මේ යතිවරයාණන් පිළිබඳ තොරතුරු අදටත් සමාජයට ලැබෙන්නේ ඉතා අල්ප වශයෙනුයි. උන්වහන්සේගේ ඡායාරූපයක් පවා සොයාගැනීම දුෂ්කර වීම විශේෂත්වයක්.
එහෙත් උන්වහන්සේ ලියූ ගී පද නම් අපේ මතකයෙන් කිසිදා මැකී යන්නේ නැහැ.
චාමර වීරසිංහගේ ගායනයෙන් ජනප්රිය වූ “දකුණේ පින් ඇති පිං බිම”, “කිරි වෙහෙරට යන පාරේ”, “උඩවැඩියා මලක් වෙලා”, “බුදු පදවි පතාගෙන”, “නුඹේ අතින් මල් මහලා”, “අමාවකට අතවනනා”, “වැදූ අම්මා නොවුන මුත් මා”, “මදුනාගල අහසේ”, “බුදුන් දැක නිවන් දකින්න”, “මඩ සෝදාගත් කළ”, “ගමට වැඩ ඇති”, “ලය ගින්දරින් ගිනිගන්නා”, “ගුරු ගෙදරට හැමදා එන”, “තණමල්විල මල් පිපුණත්” වැනි ගීත රැසක් අදටත් රසිකයන්ගේ හදවත් තුළ ජීවමානයි.
ඒ ගීතවල වචන තුළ තිබුණේ හුදෙක් සරල පදවැල් පමණක් නොවෙයි. ගැමි ජීවිතය, ආගමික හැඟීම්, ආදරය, විරහව, මව් සෙනෙහස සහ මනුෂ්යත්වය වැනි හැඟීම් රැසක් ඒ තුළ ගැබ්ව තිබුණා.
කවි කීර්ති ස්වාමින් වහන්සේගේ නිර්මාණ දායකත්වය චාමර වීරසිංහට පමණක් සීමා වූයේත් නැහැ.
කරුණාරත්න දිවුල්ගනේගේ “කරඹ මල් පිපී සුවඳයි හේනේ පැල මගේ”, රොෂාන් ප්රනාන්දුගේ “හමුවෙන්නට සමුගන්නට ඇවිත් යන එන” සහ චන්දන ලියනාරච්චිගේ “කිරි වෙහෙරට ඉහළින් දඟ කරන සඳවතී” වැනි ජනප්රිය ගීතවලටද උන්වහන්සේගේ නිර්මාණ දායකත්වය ලැබී තිබෙන බව සඳහන් වේ.
විශේෂයෙන්ම චාමර වීරසිංහගේ සංගීත දිවියට පද රචකයෙකු ලෙස උන්වහන්සේ ලබාදුන් දායකත්වය අතිශය වැදගත් එකක් ලෙස සැලකිය හැකියි.
අවාසනාවකට, වාර්තා වන ආකාරයට 2011 වසරට ආසන්න කාලයක සිදුවූ රිය අනතුරකින් කවි කීර්ති ස්වාමින් වහන්සේ අපවත් වී තිබෙනවා.
උන්වහන්සේගේ අවසන් කටයුතු සිදුවූ අවස්ථාවල ඡායාරූප අතරින් හඳුනාගත හැකි කලා ක්ෂේත්රයේ සමීපතමයන් ලෙස ගී පද රචක ශෙහාන් ගලහිටියාව සහ සංගීත අධ්යක්ෂ ප්රියන්ත නාවලගේ වැනි නිර්මාණකරුවන් දැකගත හැකි වූ බවද සඳහන් වේ.
අද අප අතර නොසිටියත්, කවි කීර්ති හිමියන් වැනි නිර්මාණශීලී බුද්ධ පුත්රයන් අපට ඉතිරි කර ගිය දායාදය තවමත් අප සමඟයි.
ඔවුන් අප අතරින් නික්ම ගියත්, ඔවුන්ගේ වචන ගීත බවට පත්වී තවත් පරම්පරා ගණනාවක හදවත් තුළ ජීවත් වෙනවා.
රඹුක සිද්ධාර්ථ හිමියන් මෙන්ම මාතර කවි කීර්ති ස්වාමින් වහන්සේ වැනි අපේ මනස සංගීතයෙන් සුවපත් කළ යතිවරයන්ගේ මතකය සදා අමරණීය වේවා.
අපේ හදවත් සැනසූ – කලාකෙත අස්වැද්දූ
බුදු ගුණය කව් ගී වලින් දී – බණ දහම් සිතට දී නික්ම ගිය
නිවන් දොර ළගම යේවා….
උතුම් නිර්වාණ සම්පත්තිය ලැබේවා! 🙏💐
