පාකිස්තානය සහ ඇෆ්ගනිස්තානය අතර දේශසීමා ගැටුම් දැඩිව ඉහළ යමින් පවතින අතර, අද (27) පාකිස්තානය තලේබාන් බලධාරීන්ට එරෙහිව “විවෘත යුද්ධයක්” ප්රකාශයට පත් කර ඇත. දෙරට දේශසීමා ආසන්නයේ වෙඩි හුවමාරු හා පිපිරීම් කිහිපයක් වාර්තා වූ පසු මෙම තීරණය ගෙන ඇති බව සඳහන් වේ.
පාකිස්තාන ආරක්ෂක අමාත්ය ඛවාජා අසීෆ් X සමාජ මාධ්යය ඔස්සේ ප්රකාශ කර ඇත්තේ තම රටේ “ඉවසීමේ සීමාව ඉක්මවා ගොස් ඇති” බවයි. “දැන් අප සහ ඔබ අතර පවතින්නේ විවෘත යුද්ධයකි” යැයි සඳහන් කළ ඔහු, මෙය තීරණාත්මක සටනක් වනු ඇති බවද පවසා තිබේ.
ඔහු තවදුරටත් චෝදනා කරන්නේ නේටෝ හමුදා ඉවත් වූ පසු ඇෆ්ගනිස්තානය කලාපීය ස්ථාවරත්වයට දායක වනු ඇතැයි බලාපොරොත්තු වූවත්, වර්තමානය වන විට එය ඉන්දියාව සමඟ සමීප සම්බන්ධතා ඇති කරගෙන ඇති බවයි. එසේම, තලේබාන් පාලනය යටතේ කාන්තාවන්ගේ මූලික අයිතිවාසිකම් උල්ලංඝනය වන බවද ඔහු පෙන්වා දෙයි.
පාකිස්තාන අභ්යන්තර කටයුතු අමාත්ය මොහ්සින් නක්වි පවසා ඇත්තේ මෙම ප්රහාර මාලාව ඇෆ්ගනිස්තානයෙන් සිදු වූ ආක්රමණශීලී ක්රියාවන්ට ලබා දුන් ප්රතිචාරයක් බවයි. පාකිස්තාන තොරතුරු අමාත්යාංශයට අනුව, තලේබාන් බලකා කයිබර් පක්තුන්ක්වා පළාතේ ස්ථාන කිහිපයකට වෙඩි ප්රහාර එල්ල කර තිබේ.
අනෙක් පාර්ශවය වන තලේබාන් ප්රකාශක සබිහුල්ලා මුජාහිඩ් ප්රකාශ කර ඇත්තේ පාකිස්තාන හමුදා ඉලක්ක කරමින් කන්දහාර් සහ හෙල්මන්ඩ් ප්රදේශවල ප්රතිප්රහාර දියත් කළ බවයි. එම ගැටුම්වලින් පාකිස්තාන සොල්දාදුවන් කිහිප දෙනෙකු මිය ගොස් ඇති බවත්, තවත් පිරිසක් අත්අඩංගුවට ගත් බවත් ඔවුන් කියා සිටී. ඔවුන් පවසන්නේ මෙය මීට දින කිහිපයකට පෙර සිවිල් වැසියන් මියගිය පාකිස්තාන ගුවන් ප්රහාරවලට පිළිතුරක් බවයි.
පසුගිය ඔක්තෝබර් මාසයේ ඇති වූ ගැටුම්වලින් 70කට වැඩි පිරිසක් මිය යාමෙන් පසු දෙරට අතර දේශසීමා බොහෝ දුරට වසා දමා ඇත. කටාර් සහ තුර්කිය මැදිහත් වූ සාම සාකච්ඡා ද මෙතෙක් සාර්ථක වී නොමැති බව වාර්තා වේ.
පාකිස්තානය දිගින් දිගටම චෝදනා කරන්නේ ඇෆ්ගනිස්තාන භූමියේ සිට ක්රියාත්මක වන සටන්කාමී කණ්ඩායම් පාලනය කිරීමට තලේබාන් රජය අපොහොසත් වී ඇති බවයි.
